حلّت الفنانة وفاء مكي ضيفةً على برنامج "كلام الناس" الذي تقدّمه الإعلامية ياسمين عز على قناة mbc مصر، حيث كشفت سبب ابتعادها عن التمثيل أخيراً، مشيرة إلى أنها رفضت التعاون مع الفنان محمد رمضان، كما تحدّثت عن تجربتها في السجن، وحقيقة ارتدائها الحجاب.

وقالت مكي: "ابتعدت عن التمثيل لأني كنت بربي ابني عمر بعد وفاة زوجي... ولكن أنا محتاجة التمثيل برده لأن ظروف الحياة الاقتصادية أصبحت صعبة، وعندي ابن محتاج فلوس ولكن الأجر حالياً مش على قد مستوايا وتاريخي".

وأضافت: "كنت هتعاون مع محمد رمضان في فيلم جديد من أسبوعين، ولكن الأجر كان قليل ورفضت لأني ممثلة قديمة ومش لسه حد هيكتشفني... ولو هنزل أشتغل وأتعب وأتفرغ لازم الفلوس تكون تستاهل أضحّي عشانها من وقتي. زمان كنت النجمة الأعلى أجراً وكان ساعتها 5000 جنيه وكنت دائماً أعلى نسبة بيع وتوزيع في المجلات والجرائد، وزمان مكنش فيه الأجور العالية والملايين اللي بتتاخد دلوقتي، ومع ذلك أنا معنديش ثروة من التسعينيات ومعملتش حاجة بالفلوس... وبقول ياريتني اتجوزت وقعدت في البيت وحد يصرف عليا".

واستكملت مكي حديثها موضحةً: "عندي معجبين كتير والرجالة كانوا بيتخانقوا عليا... وفيه شخصيات كبار عرضوا عليا الزواج وملايين مقابل إني أسيب مجال التمثيل، ولكن أنا رفضت لأني كنت مركزة في شغلي ومستقبلي، لدرجة كان عندي معجب كل يوم يجيلي تحت البيت وبقيت أخاف منه، ودلوقتي ندمانة لأن فلوس التمثيل معملتش بيها حاجة".

وعلّقت وفاء مكي على أزمة سجنها بتهمة تعذيب خادمتين، مشيرةً إلى أن لله حكمةً في ذلك، بالقول: "عندي خدامات بيساعدوني دلوقتي في البيت... والحكاية دي بقالها 20 سنة وأكتر، ولما حد بيتكلم بقوله دا موضوع ملهوش لازمة ولما بفتكر بقول إيه التهريج دا؟ وبضحك، ولكني اقتنعت أن اللي حصلي له حكمة يعلمها الله والضربة اللي مش بتقتل بتقوّي".

كما تطرقت للحديث عن نجلها عمر، قائلةً: "أنا بضطر أصحى الفجر وأنام الساعة 11 علشان أروح المدرسة وأرجع وأذاكر له، علشان أشتغل لازم أجيب وقت... لكن ماعنديش الوقت ده، ابني مسؤول مني مسؤولية كاملة، علشان أجي البرنامج كل دقيقة تليفون لدرجة كنت هجيبه هنا، جاله بطولة فيلم وهو عنده 5 سنين وهو دلوقتي 12 سنة ولكنه رفض لأنه مبيحبش التمثيل وهو ما شاء الله قمّور وشعره مسبسب، وفي المدرسة في حاله ومسمينه المحترم بس بيرازي فيا في البيت".

وعن حقيقة ارتدائها الحجاب خلال الفترة الماضية، أشارت وفاء مكي إلى أنها ارتدت الحجاب بسبب استضافتها في برنامج ديني، قائلةً: "الحجاب لا عيب ولا سُبة وكنت في برنامج ديني وكنا بنصوّر في مصر الجديدة وقعدت أدوّر على إيشارب لأنهم قالولي لازم حجاب عشان فيه شيخ وقرآن، وقعدت ألفّ لحد ما اشتريت حجاب احتراماً لهيبة الشيخ... ولكن أنا متحجبتش".

وأضافت: "اتجوزت مرة واحدة بس من والد عمر ابني... وتوفّاه الله، وعمر كان عنده سنتين وكرّست حياتي لابني... لأنه بقى كبير وهو عندي بالدنيا وخايفة أتجوز حد يزعّل ابني وهو بضل مليون راجل".

إلا أنها عبّرت عن ندمها لعدم زواجها واهتمامها بالفن، مشيرةً إلى أنها لو عاد بها الزمن كانت ستتزوج بعد وفاة زوجها، بالقول: "ناس كبار طلبوا أسيب الفن وأتجوزهم وعرضوا عليا ملايين... ولكن دا نصيب في النهاية ولو رجع بيا الزمن هاخد الفلوس وأتجوز لأن فلوس الفن معملتش بيها حاجة وابني والده توفّاه الله".

واختتمت وفاء مكي بالقول: "وأنا غلطت بس ملقتش حد يوعيني وأنا كنت مغيبة لدرجة مش بفتكر عملت كام عمل والعمر سرقني والرجالة كانوا بيتخانقوا عليا ولحقت أجيب عيل قبل القطر ما يفوتني".