حلّ الفنان أحمد العوضي ضيفاً على برنامج "صاحبة السعادة" الذي تقدّمه الإعلامية إسعاد يونس على قناة dmc، حيث كشف أسرار علاقته بزوجته الفنانة ياسمين عبد العزيز والصعوبات التي واجهته أثناء العمل معها في مسلسلَي "ضرب نار" و"اللي مالوش كبير".

وقال العوضي: "مش واخدين قرار إننا نكون ثنائي، حسب الموضوع اللي قدامنا، ولما عملنا "اللي ملوش كبير" ونجح حبّينا نوثق النجاح ده بـ"ضرب نار" وممكن السنة الجاية منبقاش مع بعض ورمضان اللي بعده نرجع وهكذا...".

وأضاف: "كان لينا هدف أنا وياسمين إننا نقدم حاجة حلوة، ومسلسل حلو عشان الناس مستنّيانا بعد "اللي ملوش كبير"، وجت من هنا فكرة "ضرب نار"، والشغل مع نجمة بحجم ياسمين عبد العزيز سهل عليا، ولكن الصعوبة إنها مراتي، مبنعرفش نفصل بس سهولته أحسن من صعوبته لأننا واخدين على بعض وبنكمل بعض وبناخد بالنا من الشغل، ولو فيه خلاف في الشغل، اللي بيقنع التاني يكسب، ممكن حد فينا يعند".

وعن عشقه للطعام، خاصًة اللحوم، قال: "أنا لحمجي، أي حاجة فيها لحمة تمام كبدة تمام، ومليش في المحاشي، وياسمين بتحب السوشي ولو كلت السوشي والأكل ده أحس إني ارتكبت جريمة، يعني آكل عكاوي، كوارع، لحمة رأس، فتة، إنما سوشي والحاجات دي بيتاكلو إزاي أصلاً؟".

وتحدث العوضي عن طفولته وعلاقته بأهالي مسقط رأسه مدينة عين شمس، مؤكداً أنه نشأ بين أبناء الطبقة الشعبية ويعتبر نفسه سفيراً لهم، موضحاً: "أنا معتز جداً بنشأتي وبحب طفولتي في عين شمس، ولسة سايبها من قريب، وبحس إني سفير للطبقة الشعبية والطبقة اللي خرجت منها، وطول الوقت بطلع أقول إني فخور بعين شمس، وأنا بعتز أوي بيهم".

وأضاف: "أنا اتربيت في بيئة بسيطة جداً وبيتنا كان 60 متر ووالدي محرمنيش من أي حاجة، ويمكن أنا ناشف شوية عشان أبويا بس اللي رباني، أمي توفيت وأنا عندي تسع سنين فمكنش فيه أم. وأي حاجة بنجح فيها لازم أنزل الشارع هناك عشان أشوف رد فعلهم عن ابنهم".

وتحدّث العوضي عن أسباب نجاح العلاقات الزوجية، مؤكداً أنه في بداية زواجه كان يتصرف بعصبية، بالقول: "في أول الجواز كنت عصبي جداً وكنت واخد الموضوع كله إني هفرض سيطرتي، ومع الوقت فهمت إن الموضوع شراكة ومش عيب إن الراجل ياخد الرأي الصح". وأضاف: "أي زواج وعلاقة ناجحة تعتمد على السرية بين الطرفين، وفي الأول ممكن تحصل مشكلة وتحكوا لحد، وممكن تبقى عايز تصالح، ومفيش كرامة بين المحبين، الكرامة ديه تأتي بسبب تدخل بعض الأفراد في العلاقة، وأنا وياسمين في أربع سنين تكيفنا مع بعض".

كما تكلّم عن حبّه الشديد لممارسة الرياضة، ووصفها بأنها عمود الحياة، موضحاً: "الرياضة هي عمود الحياة، وهي اللي هتخليك بني آدم، ولازم تلعب أي رياضة، ولازم طول الوقت أنزل ألعب الرياضة اللي عايزها".

وفي الختام، نصح العوضي الشباب بتجنّب المواد المخدّرة، حيث قال: "متروحش لسكة المخدرات لإنها بتدمّرك، حتى لو شايف إنك بتاخد قليل منها، والعقل هو اللي بيوزن كلامك، حتى لو شقي العقل هو اللي بيوزن كلامك حتى لو بتتخانق".