خلال مداخلة هاتفية مع برنامج "ملفات" الذي تقدّمه الإعلامية أميرة بدر على شاشة "هي"، علّقت الفنانة ليلى طاهر على شائعة وفاتها والتي انتشرت على مواقع التواصل الاجتماعي خلال الساعات الماضية، مما أثار قلق محبيها عليها.

وقالت ليلى: "أنا سعيدة بالخبر ده، سعيدة علشان بحس بحبكوا ليا، لما يمكن قصدوا إنهم يزعلوني لكنهم أسعدوني، وأنا مش فاهمة جابوا الخبر ده منين، ومش أول مرة، وكل شهر بيكتبوا الخبر، وهما مش لاقيين حاجة يكتبوها، فلّسوا مفيش أخبار ولا صحافة ولا أي حاجة، وده مقصود مش خبر يتهيألهم إنه صح لأ، اتكتبت بالنسبة لفنانين وفنانات كتير، واتكرر بشكل كبير، وطلعت كلها أكاذيب وإشاعات".

وأضافت: "والمقصود مش توصيل المعلومة، وقاصدين يوصلوا المعلومة الكاذبة ليه بقى أنا مش عارفة، أنا بحب الفن بكل صوره، تلاقيني في وقتي الفاضي كله بتفرج على التلفزيون بشوف المسلسلات والوجوه الجديدة، والأعمال الفنية الحلوة سعيدة إن الفن المصري بيرجع لأصله تاني، لأنه مر بوعكة بسبب الظروف اللي حصلت في البلد، بقوم الصبح أقرأ الأخبار في الموبايل، وأشوف الرسائل وأردّ عليها، وبعدين أقوم أمشي في الجنينة وألعب مع الكلاب شوية، وأشوف لو ورايا حاجة أعملها ورايا زيارة مهمة، أروح النادي، حياة أسرية الفن كان واخدني منها شوية".

وعن عودتها الى الفن، قالت ليلى طاهر: "مينفعش أرجع دلوقتي للفن، وكان نفسي ومنى عيني أستمر في الفن لآخر يوم في عمري، والتوقف اللي حصل خلاّني أتوقف، ومجاش ليا دور حلو لغاية دلوقتي، واتعرض عليا أدوار مش بنفس المستوى، وأرجع بحاجة قوية جداً يا بلاش، واللي أنا عملته مبسوطة وأفتخر به".

واختتمت ليلى طاهر حديثها بالقول: "بحب أتفرج على كل الفنانين لأن في ناس جديدة وناس قديمة كبروا وبقوا عتاولة، ومقدرش أقولك مين، ونفسي الفن السينمائي يرجع زي ما كان".