ردّ محمود حمدان مؤلف مسلسل "غالية بـ100 راجل" على التعليقات والانتقادات التي نالتها إطلالة بطلة العمل الفنانة سمية الخشاب في البرومو والصور التي انتشرت على مواقع التواصل الاجتماعي من كواليس المسلسل، والذي من المقرر عرضه في رمضان المقبل 2024.

وقال حمدان: "الصور المتداولة لسمية الخشاب عبر منصات التواصل الاجتماعي ليست حقيقية، ويبدو أنها معدلة بتقنية الذكاء الاصطناعي".

وأضاف: "أنا مش هحرق القصة طبعاً، لكن أعتقد إن الصور المتداولة الناس عملتها بتقنية لتعديلها، أنا حضرت حاجات في المونتاج، والموضوع مش كده خالص، بالعكس هي عارفة الشخصية اللي بتلعبها كويس قوي ومركزة كويس قوي، هي وكل الممثلين اللي معاها".

من ناحيتها علقت سمية الخشاب، على البرومو قائلة: "اللي نزل ده البرومو التشويقي الأول، والبرومو الأساسي لسه منزلش بيتعمل لسه بمعرفة المخرج إبرام نشأت".

وأضافت : "أنا سعيدة جداً ومتفائلة.. لسه أساساً مفيش حاجة نزلت بس بشاير النجاح هلت يارب يكملنا على خير، والمسلسل جامد أوي والموضوع قوي جداً، والمخرج عامل شغل عالي".

وتابعت سمية الخشاب: "أنا مركزة جداً ومعانا عمالقة في التمثيل منورين العمل يارب التوفيق، واللي حصل ده تشويه متعمد".

مسلسل" غالية بـ 100 راجل" يشارك في بطولته عدد كبير من الفنانين إلى جانب سمية الخشاب، أبرزهم محمود عبد المغني، هالة فاخر، سماء إبراهيم، محمد رضوان، نانسي صلاح، أحمد عزمي وآخرين، والعمل من تأليف محمود حمدان، وإخراج إبرام نشأت.