خلال استضافته في برنامج "أسرار" الذي تقدّمه الإعلامية أميرة بدر عبر قناة "النهار"، كشف المخرج محمد سامي أسباب خلافه مع الفنانة القديرة عفاف شعيب ودوافع هجومها عليه، كما تحدث عن خلافه مع تامر حسني وسبب عدم عملهما معاً الفترة الأخيرة، وردّ على الهجوم الذي تعرّض له أثناء عرض مسلسل "نسل الأغراب" في رمضان 2021.

وقال محمد سامي: "تعرضت لهجوم وقالوا إن مسلسل "نسل الأغراب" فشل، لكن ربنا جابلي حقي. المسلسل مكانش فيه مقارنة بين محمد رمضان وأمير كرارة، ولكن رمضان كان هيبقى مكان السقا وحصل لخبطة، لكن أنا نجحت معاهم كلهم وهما نجوم كبار، واللي هاجم المسلسل فين دلوقتي، طيب خليه فشل، كنت بتتفرج عليه إزاي!".

وعن اتهامات الفنانة عفاف شعيب له في وقت سابق بأنه أجبرها أثناء التصوير مسلسل "آدم" على الصعود الى سيارة الشرطة رغم شعورها ببعض الألم في ظهرها، قال سامي: "قصة عفاف شعيب كلها كذب، وأنا بحترم سنّها لأنها ست كبيرة، وهي قالت كلام كتير كله كذب، القصة الحقيقية إننا مرة كنا بنصور مسلسل "آدم" ونفس الوقت بيتصور جنبنا مسلسل اسمه "دوران شبرا"، والأستاذة عفاف استأذنت قالتلي أخويا تعبان ومسافرة أعالجه، قلتلها تمام، وأنا بصوّر بالصدفة كلّمني صديق صدفة اسمه جوزيف قاللي تعال عدّي عليا أنا بصوّر مشهد لعفاف شعيب، وعرفت إنها في استوديو ورانا، وموضوع ضهرها ده محصلش".

وعن حدوث خلاف بينه وبين الفنان تامر حسني، قال محمد سامي: "مرة حصل بيني وبين تامر خلاف كبير والناس متعرفش الموضوع ده، وكنت بعدها مفتقده جداً، لحد ما شفته صدفة وضحكنا لبعض، وقلتله مفتقدك أوي في المكالمة الساعتين اللي نصّها ضحك، لأنه أخف دم في العالم". وأضاف: "أنا أكتر واحد اشتغل مع تامر حسني في الوطن العربي، عملت معاه إعلانات وكليبات ومسلسل، إزاي مفيش بينا كيميا؟ وبعدين تامر دلوقتي مخرج زميل، وكله إلا تامر حسني، أنا عندي الوسط الفني في كفة وتامر في كفة... أنا كلّمت تامر حسني لما اختلفت في وجهات النظر أنا وأنغام في مسلسل "نسل الأغراب"، وعملّي أغاني قيمتها بالملايين من غير ما ياخد ولا مليم، ونزل بات في الاستوديو كأنه مسلسل من بطولته".