يوم أنا طالب هقيت انّي عَرَفْت

يوم أنا طالب تحمّسْت وْوعدت

يوم أنا طالب علَى الغيمهْ رسمت

يوم أنا طالب تخيّلت وحلمت

يوم أنا طالب حَسبْت انّي وصلت

وانتهَى ربيع الاحلام وْظهرت

ينجرح شوف العيون إلَى التفت

إن بغيت امشي لقيت انّي وقفت

الحقايق فاجأتني مابدأت

وانكسر غصْن الخيال الّلي زرعت

لكن انّي رغم هذا ماانهزمت

كلّما زادت مواجيعي صبرت

ماغلبت الوقت لكن ماانغلبت

كلّها لعيون معشوقٍ عشقت

كل مافي الكون مِنْ سرّ الحياهْ

إنّي أصلح ماتبيّن لي خطاهْ (1)

ضحْكة الدّنيا علَى عذب الشّفاهْ

إنّي ألبس من هَدَبْ شمسي عباهْ

أثْرني مادِسْت بالرِّجل الوطاهْ

أصْدم الواقع ويصْدمْني عطاهْ

كِنْ في حجْر العيون أكبر قذاهْ

وانْ رفعت الصّوت ماجاني صداهْ

والزمان اسرع من الّلي في رجاهْ

والتوَى صدْري علَى تسعين آهْ

واستمرّيت ادعسْ الشّوك بْحفاهْ (1)

بين ثلج وبين جمراتْ الغضاهْ

أعتصر نبْعي منْ بْطون الصّفاهْ

ديرتي ديرة رفيعين الجباهْ