حلّت الفنانة سمية الخشاب ضيفة في الجزء الثاني من حلقتها ببرنامج "حبر سري" تقديم الإعلامية أسما إبراهيم، المذاع عبر قناة "القاهرة والناس".

وقالت سمية، إنها لم تضح بتكوين أسرة وأطفال من أجل الشهرة والفلوس، مؤكدة أن الزواج والخلفة نصيب وليس له علاقة بتدخل أحد.

وأضافت ردًا على سؤال هل ممكن تضحي بالخلفة وتكوين أسرة من أجل الشهرة والفن: الزواج والخلفة نصيب بتاع ربنا، مالوش علاقة والإنسان مالوش اختيار فيها لو ربنا عاوز يجي مخلوق على الأرض هيجي" مضيفة أنها لا يمكن أن تضحي بالفن أو تتنازل من أجل الزواج بشخص، وذلك ردًا على سؤال، لو فيه راجل قال لك هعملك كل اللي أنتي عاوزاه لكن تقعدي في البيت وتابعت: "هو يجي راجل ليه ويتشرط عليا، اللي هيجي يجي بشروطي، مش بشروطه هو أساسًا".

وعن إمكانية تقديمها مشهداً مشابهاً لمشهدها المثير مع الفنانة غادة عبد الرازق في فيلم "حين ميسرة"، لو طلب منها ذلك لعرضه على منصة إلكترونية، أكدت أنها لا تمانع تقديم أي عمل يتناول موضوعاً هادفاً يوجه الشباب أو يبرز شيئاً منافياً للآداب.

وأضافت: "المنصات اللي ظهرت مؤخرًا تقدم جميع أنواع المشاكل والموضوعات، وكثير من الأفلام التي تعرض عبر المنصات تتناول موضوع المثلية الجنسية".

وتابعت: بالنسبة لي لو عندي موضوع هادف يوجه وينصح الشباب الجديد لشيء منافي للآداب ولتعليمنا ودينا وستكون مفيدة للجيل الجديد، أكيد هعملها مش فكرة إني بعمل حاجة عيب أو حرام".

وردت على سؤال هل ترين أن الفن ليس عيباً أو له حدود وسقف؟، قائلة: ما دام ده فن وموضوع هادف وهيفيد الناس في نطاق عاداتنا وتقاليدنا ليه لأ، ممكن تقدمي موضوع دون أن تجرحي مشاعر المشاهد وهذا يعتمد على مخرج شاطر وورق كويس.

وردت الخشاب على سؤال: هل قصدت تظهري مع عمر كمال في كليب أوعدك عشان تتشهري؟، قائلة: "أنا ناجحة من قبل عمر كمال طبعاً وهو عنده أغاني مجبتش مشاهدات وفيه أغاني مجبتش مليون مشاهدة حتى، وعنده أغاني مش جايبه حاجة ومفيش الكلام اللي بيقوله بتاع أنا الأغاني بتاعتي كلها بتعدي الـ50 مليون، مفيش الكلام ده وعادي مش عيب برده أن يكون فيه أغاني متجبش مشاهدات".

وواصلت: "أنا ولا شلت إيدي ولا حاجة من فيديو كليب أوعدك، هو كان عايز يصور الفيديو كليب تاني وأنا معنديش وقت للكلام ده والمونتاج والتصوير تاني، والأغنية ناجحة عشان حلوة مش عشان مين أعلى من مين لا طبعا وأنا وشي حلو عليه".

وأضافت ردًا على سؤال، استغليتي تصريحاتك عن الطحال وبقيتي نجمة سوشيال ميديا، قائلة: "هما اللي استغلوا التصريحات عشان المصيبة اللي حصلت لي، وحاجة سخيفة أن الناس تطلع كوميك وتهزر أقول لهم إيه إن شاء الله تجربوا اللي أنا جربته لازم الناس تحترم مشاعر بعض ما ينفعش نهزر على كل حاجة ونقعد نطلع كوميك على حاجات تتعبنا كبشر".

وأضافت: "الدنيا دوارة وكله سلف ودين في بعض الناس بيعملوا كوميك على مصايب ومشاكل ناس تانية بتتألم طيب يا رب يبقى عندهم اللي عندي، في ناس مستظرفين نفسهم وتافهين يخلوا مشاكل الناس مادة للسخرية هما سخفاء وجهلة".

واستكملت: "بطلت أتوجع من كتر السخافات، فيه ناس بتقولي إزاي الطحال أنا ما عنديش طحال أصلا فاكرين إنها نكتة وناس تقول لي أخبار الطحال إيه يا فنانة.. ده السؤال المتداول ما بقتش أضايق، أنا متصالحة مع نفسي والحياة، صحتي كويسة يمكن هو كان فيه مشكلة ومن ساعة لما شيلت طحالي بقى دمي خفيف واحلويت وبقيت فرفوشة.

وعن سبب قلة أعمالها الفنية مؤخراً على عكس الفنانة رانيا يوسف، قالت سمية الخشاب: "النجاح مراحل، وفيه مرحلة بعد ما تتشهري مش بتبقي محتاجه تشتغلي غير عمل واحد قوي كل فين وفين عشان متحرقيش نفسك، ومش بتدوري على عدد الأعمال بل على قوتها".

وواصلت: "وفيه مرحلة تانية بتبقي محتاجة تعملي أعمال كتير عشان تتشهري وأنا بتابع زمايلي، وبحب رانيا يوسف جدا، ورانيا لسة في مرحلة الانتشار والشهرة، ولسة بتكبر وحلو إنها بتنتشر دلوقتي وبتطلع السلم".

وأضافت: "ورانيا هتوصل لمرحلة أنها مش هتبقى محتاجة تشتغل كتير، لأنها وصلت خلاص، ورانيا كانت بعدي وأصغر مننا أنا وغادة عبد الرازق في مسلسل "عائلة الحج متولي"، وإحنا كنا أقدم بردو وهي كانت لسة في الأول".

وتابعت: "النجاح نسبي، ومفيش حد بيحقق نجاح زي حد تاني بالظبط، وفيه ناس تطلع جدا وتقع مرة واحدة، ودي طبيعة الحياة ومش طول الوقت هتكوني ناجحة ومكسرة الدنيا فيه حاجة اسمها سلم النجاح".

وعن تصريحات الناقد الفني طارق الشناوي الذي قال إن تمثيلها في مسلسل موسى الذي عرض ضمن الماراثون الرمضاني الماضي مبالغ فيه، قالت سمية ساخرة: "أيوة أنا تمثيلي مبالغ فيه تلات حبات".

وبسؤال المذيعة لها، لو نصحك إنك تاخدي كورس؟، قالت ساخرة: "بعد كل السنين دي هاخد كورس؟".

ورداً على سؤال هل قصدت تظهري مع محمد رمضان في مقطع الفيديو المنتشر على مواقع التواصل الاجتماعي عشان تطلعي "تريند"؟ قالت: "أنا نجمة ومشهورة من قبل ما محمد رمضان يكون نجم وهو زميل وكان موجود في مهرجان الجونة".

وواصلت: "وأنا ومليون ممثل تاني كنا موجودين، ومفيش الكلام دا، أصل إيه اللي بقصد أظهر معاه عشان أتشهر؟ أنا كنت قاعدة مع صحابي وهو كان موجود ووقف جنبي كزميل عادي ومش متفقين على كدا".

واختتمت حديثها قائلة: "وهو ما شاء الله لما بيكح بيطلع تريند، وأنا ما شاء الله بردو لو كحيت هطلع تريند، بالتالي أنا مش مستنية التريند يعني، وأنا مش بظهر مع محمد رمضان أصلا دا هي مرة أو مرتين بالصدفة".