كشفت الفنانة نشوى مصطفى، عن شعورها بآلام قوية في الأسنان بطريقتها الطريقة والساخرة.

وكتبت عبر حسابها على "فيسبوك": "لما الغدر يجي لك من أقرب حاجة لروحك- لما هذا الغادر اللي كان مصاحبني تقريباً خمسين سنة وكنت مستأمناه على حياتي يخوني ومش كده بس- ده تآمر عليا هو ومجموعة كبيرة من المحيطين بيه بمنتهي الخسة ولا راعو العشرة والعيش والملح اللي بينا وعمالين يطعنوني بخناجر في راسي وقلبي وروحي- لما أحاول بكل الطرق إني أتجنب الألم اللي سببوه ليا بكل الوسائل اللي وصلت للمهدئات ويزودوا بمنتهي الغباوة الطعن المميت - تفتكروا اعمل ًيه".

وتابعت: "أنا خلاص قررت أخلعه من حياتي- ضرس العقل اللي في الفك العلوي متزعم حركة تمرد في بوقي ومقوم عليا كل الضروس والسنان أخدت كل ما امتدت إليه إيدي من مسكنات- كتافاست وبروفين ٦٠٠ وبنادول وبرضو عمال يصرخ في بوقي- ادعولي يهدى شوية لأني فعلياً ألم وجع السنان أصعب من ألم الولادة.

وفي سياق آخر، كشفت نشوى مصطفى، عبر حسابها الشخصي على "فيسبوك"، عن سبب تعرضها للاكتئاب في بعض الأحيان وأسباب اعتذارها عن الأعمال الفنية.

وكتبت قائلة: "حاحكي لكم حكاية علي سبيل الفضفضة واسفة لو حازعجكم، بقالي فترة طويلة مش باشتغل التمثيل اللي اتمناه، اللي هو طموحي، واللي هو أنا لحد اللحظة دي مامثلتش طموحي، ولا حتي شبه طموحي، إلا في شوية أعمال يتعدوا علي الصوابع ومنهم مثلًا المسرحية اللي كتبتها علي مقاس احلامي في التمثيل، أقصد سيلفي مع الموت، ولأن الكلام ده كان من أربع سنين فالتمثيل وحشني أوي".

وأضافت: "كنت فاكرة إن أي شغل حيجي لي حوافق على طول، لقيت نفسي بيتعرض عليا أدوار باقراها وأعتذر، وبعد ما أعتذر أقعد فترة مكتئبة وألوم نفسي طيب ليه اعتذرت، فنفسي ترد تقول لي ماهو انتي ماحسيتيش انك حابة اللي قريتيه يومين تلاتة وأنسى".

كتابة: القاهرة – "لها"