نشرت الفنانة ميرهان حسين عبر حسابها الخاص في "إنستغرام" صورة ظهرت فيها مرتديةً الحجاب والعباءة البيضاء وهي تؤدّي مناسك العمرة.

وكشفت ميرهان عن تردّدها في نشر الصورة بسب الانتقادات التي قد تطاولها من بعض الذين وصفتهم بـ"السطحيين"... وعلّقت على صورتها قائلةً: "مع إن الصورة دي من أحب صوري لقلبي... اتردّدت أنزلها... أولاً خفت إن دا يأثر على ثواب حاجة بيني وبين رب العالمين".

وأضافت: "ثانياً عارفة إن في ناس سطحية كتير هايكتبوا كومنتات كلها إيه يا طاهرة إيه يا ست الشيخة، ويعملوا فيها إنهم مابيغلطوش أبداً، وجايين يحكموا على ناس زيهم أحكام هبلة وخلاص، وهمّا مايعرفوش اللي بينك وبين ربنا ولا عمرهم هايعرفوه... بس قولت لأ مش هامشي ورا الفكر دا وهانزّل صورتي اللي بحبها عشان فيها ذكرى وجودي في أطهر بقاع الأرض، وأنا ضيفة في بيت الله الحرام، وبحتفل فيها بنعمة من أكبر النعم هي نعمة إن ليا رب عظيم اسمه الكريم اللي ممكن أطلب منه أي شيء ومفيش حاجة كبيرة عليه، إنما أمره إذا أراد شيئاً أن يقول له كن فيكون".

واختتمت بالقول: "نعمة وجود ربنا في حياتنا أكبر من كل النعم، أنا حقيقي معرفش إزاي في ناس بتلحد وتنكر وجود ربنا والعياذ بالله، وفيه منهم أصحاب ليا وناس بقابلهم، ومع حبي ليهم بس بقولهم فايتكوا أعظم حاجة في الوجود إن يبقى ليك رب قادر على تحقيق كل اللي يتمناه قلبك، ويسرح فيه خيالك رب أكبر من كل كبير هو الأمان في الدنيا دي وكل من عليها فان".

يُذكر أن آخر أعمال ميرهان حسين، هو مسلسل "نقل عام" الذي عُرض أخيراً، وشاركت في بطولته مع الفنان محمود حميدة وسوسن بدر، وهو من إخراج عادل أديب.