حلّت الفنانة الكبيرة أنوشكا ضيفةً على برنامج "كلمة أخيرة"، الذي تقدّمه الإعلامية لميس الحديدي عبر شاشة قناة ONE، وذلك في الحلقة التي جمعتها مع الفنان خالد النبوي بطل مسلسل "راجعين يا هوى"، حيث كشفت عن تفاصيل خلافها مع محمد سلامة، مخرج المسلسل، الذي عُرض خلال السباق الرمضاني 2022، وحقق نجاحاً كبيراً منذ عرض أولى حلقاته.

وقالت أنوشكا: "أنا كنت حابة التجربة ككل، وكل مشهد كنت بصوره كان في شد وجذب مع المخرج محمد سلامة، بس أنا بقولها أنا سعيدة جداً إني اشتغلت معاك يا سلامة، حاسة إنه أضاف ليا رغم الخلافات".

وعن تفاصيل الخلاف قالت أنوشكا: "أنا ست اللي في قلبي على لساني ومش هتغير، وأنا مبسوطة بنفسي كده ومش عايزة أتغير، ولو حاجة مقتنعة بيها أنا خاتم في صباعك طول ما إحنا بنشتغل، وفي أول مقابلة بيني وبين محمد سلامة، هو عمل مسلسل السنة اللي فاتت، وكان في مشهد كنت متحفظة عليه بشكل رهيب لأني بحب الحيوانات".

وأضافت: "أنا كنت أعرف اسم محمد سلامة، ولكن مش مجمعة الاسم مع الصورة، ودخلت سلّمت عليه، وأول ما عرفت إنه مخرج مسلسل "موسى" وافتكرت المشهد اللي كنت متحفظة عليه، قلت له أنا زعلانة منك، ولو مكنتش اتصافيت مع سلامة في النقطة دي مكنتش هقدر اشتغل معاه".

وتابعت: "تاني مرة هنتقابل فيها، محمد سلامة ادّاني ميعاد في مكتبه واتأخر 3 ساعات، وطلع عنده مشكلة إن الماسورة ضاربة عنده في البيت، وفي آخر يوم تصوير الكهرباء ضربت في الاستوديو".

واختتمت أنوشكا حديثها عن المخرج محمد سلامة قائلةً: "لما بدأت شغل مع سلامة، لقيت إن في نقاط تشابه كتيرة، وبعدين لاحظت إنه هو في داخله طفل كبير، ومش هنسى في آخر مشهد وبنتصور كلنا، ببص ورايا لقيته عينيه حمراء من الإحساس وقد إيه هو متأثر إننا خلصنا، ولمّا شوفت عينيه مدمّعة بدأت أعيط بسبب الضغط العصبي".