ردّت الإعلامية منى عراقي على الانتقادات التي طاولتها بعد نشرها مقطع فيديو يجمعها بالفنان سمير صبري قبل أيام من وفاته.

وتسبّب ظهور الإعلامية منى عراقي برفقة الفنان سمير صبري في مقطع فيديو نشرته عبر حسابها الخاص في "فيسبوك"، وهي تحاول إقناعه بترديد كلمات أغنيته "سكر حلوة الدنيا سكر"، لكنه رفض التصوير، فامتثلت لرغبته قائلةً: "طيب بلاش".

ونشرت منى فيديو جديداً كشفت من خلاله عن الأسباب التي جعلتها تنشر الفيديو، رداً على الانتقادات التي وُجّهت إليها، حيث قالت في الفيديو إنها صديقة للفنان سمير صبري منذ فترة وبينهما أصدقاء مشتركون، مضيفة: "أنا وأستاذ سمير أصحاب من زمان وبينا أصدقاء مشتركين وطول ما هو عيان في المستشفى كنا بنروح ليه ولما خرج من المستشفى راح الماريوت أخد أوضة بتطل على الجنينة زي ما بيحب، وروحنا ليه اتعشينا معاه واقترحت عليه نعمل فيلم نسميه "حلوة الدنيا سكر"، لأنه كان بيقعد يحكيلي إن عنده تفاصيل كتير جداً عن الفنانين خصوصاً سعاد حسني ولسه مطلعتش، اتصورت معاه في الأول صورة وبعدين فيديو وغنيت أغنية "حلوة الدنيا سكر"".

وأضافت: "ده كان قبل ما يموت علطول، ولم يكن مستاء من التصوير، أنا لم أخالف أي أعراف في تصوير شخص، هو كان حالته كويسة جداً وبيتكلم عادي، مش زي ما ناس صورته وهو متعلق له محاليل، الراجل كان فاكرني بعمل برومو وهنشره وهو كان رافض نحرق الفكرة أو أي حاجة تطلع عن إننا بنعمل حاجة مع بعض. هصوره ليه غصب عنه... لا هو في حالة وحشة ولا متوصل بخراطيم زي ما الناس كانت منزلة، الراجل كان زي الفل وصحته كويسة، أنا عرفت إن النيابة جت حققت في موته لأنه كان كويس جداً، الفيديو مفيهوش أي إساءة ليه خالص". 

واختتمت منى عراقي كلامها مؤكدةً: "الكلام ده يتصدق لما هيبقى في حالة مكنش مفروض يتصور فيها لكن الراجل زي الفل، كل الموضوع إنه كان بيقولي بتصوري إيه لأ متطلعيش البتاع ده دلوقت، وكنت عايزة أكتب القصة".