علق الفنان خالد عليش، من خلال منشور كتبه عبر حسابه الرسمي على "فيسبوك"، على تصريحات محامي طليقته ميما الشامي التي اتهمه فيها بأنه استغل قضية ابنته، من أجل التريند وأصبح حديث مواقع التواصل الاجتماعي خلال الفترة الماضية، وابنته غضبت منه لأنه كان وعدها بالسفر للخارج معه ثم أخل بوعوده وسافر مع زوجته الجديدة.

وقال خالد في منشوره: "الحقيقة بقف كتير قدام ناس معرفش بيفكروا إزاي، المفروض ما نرددش كلام وخلاص عشان إحنا.. مش بغبغانات.. إحنا ربنا أدانا عقل نفكر به.. يعني بحارب إني أشوف بنتي بقالي سنة يبقي أسافر معاها ازاي".

وتابع: "على حسب تصريحاتكم وعدتها بالسفر يعني النية موجودة.. بس أسفرها إزاي وأنا مش عارف أشوفها ساعتين ثلاثة، ده يوم المُنى إن مامتها توافق إني أسفرها ونسافر أنا وهي لوحدنا.. يتقال ده بخيل ومش عايز يدفع للبواب كام جنيه عشان يغسل عربيتها وأنا بعيد أصلاً عشان آجي أحاسب البواب وهي بتاخد الآلاف فيتقال ده مقصر في المصاريف".

وأضاف: "يتقال ده مدفعش فلوس التمارين اللي أنا مش عارف أشوفها ومعرفش بتروح ولا لا، وبتروح كل الحاجات اللي بيتقالي عليها ولا لا وأنا بدفع الآلاف ثانية وتردد ما بيدفعش.. يتقال دي جابت كب كيك أومال المبالغ اللي بتدفع في الشهر دي بتدفع ليه.. ويتردد ده ما بيدفعش".

واستكمل خالد عليش حديثه: أنا عايز أقفل الموضوع وما تكلمش فيه أكتر من كده بس بلاقي كلام مستفز اللي عايز يحل بيحل مش بيقعد يرغي أنا عارض الصلح من خلال الأهل والأصدقاء، والمعارف والمحامين بالمناسبة، ومع ذلك بيكون الرد لا.. لدرجة إني عرضت الصلح امبارح في كومنت أتمسح واتعملي بلوك".

وواصل: "أنا طلبي شرعي وبسيط أشوف بنتي بشكل إنساني وأفسحها وأخرجها وأسفرها وأعيش دوري كأب.. مكنتش عارف أشوفها بشكل منظم فاضطريت إني ألجأ للقضاء اللي أداني رؤية 6 ساعات في مركز شباب أتحايلت إنه ما يتنفذش وأشوف البنت بالود منفعش روحت مرتين ثلاثة ومقدرتش استحمل لا أنا ولا البنت.. طيب أعمل إيه ما أنا بقول الود أهو.. أنا مش عارف بتعاقب ليه وعلى إيه".

واستكمل: أنا آسف إني رفعت قضية لازم أفضل مذلول عشان أشوف بنتي اللي هي حقي، الموضوع لا محتاج ناس تتشهر على قفايا ولا تصريحات.. الموضوع يخلص في قعدة واللي خلاني لجأت إني أكتب ده واللي قبله إني مش لاقي حل ودي ولا حد يتدخل بالرغم إن بقالي سنتين بيتقال عني كلام مش حقيقي، مع إني بدفع اللي مطلوب مني وكله تمام بس مكنش هاممني أرد باللي بيتعمل دلوقتي شوية وهابطل أرد وأسيب اللي يقول يقول".

واختتم خالد عليش حديثة قائلًا: "أخيرًا مستحيل أب يلجأ للرؤية عشان يكسر والدة طفله لأن ما فيش حد بيتكسر بعد الطفل إلا الأب.. أب أكيد فشل إنه يشوف طفله وقرر يروح مكان تحت رحمة الأم وكسرته تزيد وهو واقف خايف يقرب من بنته المشحونة ناحيته ومستني يشوف هتحن عليه بابتسامة ولا لا".