حلّت الفنانة دينا الشربيني ضيفةً على برنامج AB TALKS الذي يقدّمه أنس بوخش عبر موقع "يوتيوب"، حيث أكدت أن الشعور بالموت والوحدة هو أكثر ما يخيفها في الحياة، قائلةً: "بخاف من الوحدة والموت، الوحدة أكتر إحساس بيخوّفني ومش بحبه، مش عايزة لما أكبر أعيش لوحدي، أكيد هيبقى نفسي في حد ياخد باله مني، لما بشوف حد كبير في السن لوحده مبتمناش أبقى كده، ومفيش حد يتمنى يكون كده".

وأضافت: "إحساس إن حد بيطبطب عليك في مضايقتك ويبقى معاك مهم جداً، مهما كان معاك أي حاجة في الدنيا ولوحدك عمرك ما هتحس بحلاوتها".

وعبّرت الشربيني عن حزنها لفقدانها صديقها الفنان هيثم أحمد زكي، الذي رحل عن عالمنا عام 2019، مؤكدةً أن لحظة تلقيها خبر وفاته كانت الأصعب في حياتها.

إذ أوضحت: "أصعب لحظة في حياتي لما واحد صاحبي أوي توفى، توفى في البيت جاله هبوط، ده هيثم زكي الله يرحمه، كنت أعرفه من زمان، بكره فكرة الموت، مش عايزاها أصلاً تيجي في دماغي، ولكن الموت بيجي في ثانية".

وأوضحت: "هيثم كنا كلنا بنحبه جداً بس يمكن هو مكنش عارف إحنا قد إيه بنحبه، فساعات ببقى عايز بس الوقت يرجع أقوله أنا بحبك، وبعدين إمشي لو عايز... المتوفى ممكن يكون في حتة أحسن ومرتاح بس بيوجّع اللي حواليه هما اللي عايشين ده، بس هما أكيد مرتاحين، دايماً بقول لأي حد أعرفه فقد حد عزيز عليه، حطوا في دماغكم إن الشخص ده سافر".

ويُعد مسلسل "المشوار" آخر أعمال دينا الشربيني الفنية، وقد قدّمته مع محمد رمضان وعُرض في الماراثون الرمضاني الماضي، وضم عدداً كبيراً من الفنانين، أبرزهم: عمرو عبد الجليل، بيومي فؤاد، سامي مغاوري، أحمد صفوت، أحمد مجدي، كارولين خليل، وهو من تأليف محمد فريد، وإخراج محمد ياسين.