ردّ الفنان حسام حبيب من خلال تسجيل صوتي لبرنامج "ET بالعربي" على تصريحات طليقته الفنانة شيرين عبد الوهاب، بشأن سرقته سيارتها وتهديده لها، مؤكداً أنه سيتخذ إجراء قانونياً ضدها.

وقال حسام: "أكيد هاخد إجراء قانوني ضد شيرين، أنا عمري ما دافعت عن نفسي ولا أتكلمت ودا كلام كله مرسل وهرد عليها بالأدلة والمستندات".

وأضاف: "كنت ساكت حفاظاً عليها وعلى سمعتها وعلى بيتها مكنتش بتكلم، بس أنا هتكلم طبعاً دلوقتي لأن الكلام بقى كتير وزيادة وأنا مبعرفش أقول كلام مرسل ولا أفتري على حد. أنا بتعرض للابتزاز عشان أسمع الكلام وبتهدّد وأنا مش مستعجل ولكني بظبط إزاي هرد عليها بالحقائق وكلامي في الإعلام هيكون مختلف وله مستندات".

وكانت شيرين قد هاجمت طليقها الفنان حسام حبيب من خلال مداخلة هاتفية مع الإعلامية لميس الحديدي في برنامج "كلمة أخيرة" الذي تقدّمه على قناة ONE.

وكشفت شيرين خلال المكالمة أنها لن تنسى سؤال العديد من الأشخاص عنها في أزمتها ومنهم الإعلامية لميس الحديدي والفنانتان ياسمين عبدالعزيز ومنة شلبي، متابعةً أنها تعلم جيداً بوجود مشاكل أهم من مشاكلها الشخصية لدى المواطنين وبدأت تشعر أن موضوعها "بوخ".

وقدّمت شيرين اعتذارها إلى الجمهور على الهواء، قائلةً: "عاوزة أستغفر ربنا على الكذب اللي كذبته عشان أخلّي صورة إنسان تبقى كويسة وأنا كذبت ودي أكتر حاجة ربنا مبيحبهاش".

وسألت الحديدي شيرين عمّا كذبت بشأنه فتردت الأخيرة: "كدبت في حاجات كتيرة أوي لأني بنت أصول وكنت عاوزة أرفع صورة إنسان ممكن يروح في يوم من الأيام يتجوز من عيلة تانية وأخلص منه ولو كنت قلت كلام وحش وقتها مكانش هيعرف يتجوز وأنا نفسي يتجوز ويبعد عني".

وأضافت: "أنا ست قاعدة في أمان الله مع بناتي بقالنا 4 سنوات شايفين الويل سافرنا الساحل وقلنا نقعد أربع أو خمس أيام ونرجع مبسوطين وتتحسن نفسية البنات ونفسيتي ومكناش بنخرج ومكناش عايشين تقريباً والبنات مكنوش بيعرفوا يقعدوا معايا، لأني كنت عايشة مع زوج مش بيشتغل تقريباً وكنت محبوسة 24 ساعة في أوضة نومي مش بعمل حاجة، قاعدة بس وأنا غلطت في حق نفسي، وكنت فاكرة إني بحافظ على بيتي لكني اكتشفت أنه مكانش بيت، كانت عيشة فئران أو مصيدة، أنا كنت زي الفار اللي بيدخل المصيدة ياكل حتة جبنة".

واستطردت شيرين قائلةً: "كنت عايشة مع راجل مش بيشتغل ولا بيخرج ولا بيشوف أهله ولا أصحابه وكل همّه حب الامتلاك ومع ذلك فضلت جنبه وهو ما يعرفش إلا فكرة حب الامتلاك وصبرت لأني كنت بحاول أنجّح الحب ده ومكنتش بحب أتهزم وأنا بطبعي أكون خدّامة للراجل اللي أعيش معاه".

ولفتت شيرين الى أنها وقت مكوثها في الساحل الشمالي، اكتشفت أن سيارة المرسيدس التي تملكها والمسجّلة باسم حسام حبيب قد سُرقت، قائلةً: "كل الناس عارفة إني كنت بحاول أجمّل صورته لكن الناس مكنتش مقتنعة وهما مش هبل وعارفين كل حاجة وأنا كنت طول الوقت بكدب عشان أجمّل صورته وعندما سرقت السيارة في تمام الواحدة بعد منتصف الليل تلقيت اتصال بأن السيارة سرقت".

واختتمت شيرين عبد الوهاب المداخلة بالقول: "شوفت أيام سودة مع حسام حبيب... وبعد الطلاق ومحاولة الرجوع فتحنا شركة كان هو رئيس مجلس إدارتها. غنّيت وأنا قرعة عشان بناتي ميتعقدوش... وحسّستهم إن ده نيولوك وقالوا إن حسام حبيب كتّف شيرين وحلق لها شعرها... وبالفعل هو اللي حلقلي شعري".