حلّت الراقصة صفوة ضيفةً على برنامج "الترابيزة" المذاع على قناة "الشمس" الفضائية، حيث كشفت عن تفاصيل زيجاتها وخطوات دخولها عالم الرقص والمجال الفني، مشيرةً إلى أنها تزوجت للمرة الثانية وهي في العشرين من عمرها.

وقالت صفوة: "كنت أعمل سكرتيرة في إحدى الشركات المعروفة في محافظة الإسماعيلية، وكان هناك أحد العملاء لدينا يعمل محاسباً، علم أنني اتطلّقت مؤخراً، وكان ميسور الحال لأنه عمل لمدة 14 عاماً في الكويت".

وأضافت: "بدون ما أفكر وبدون ما أحبه اتجوزته وعملي فرح أسطوري وشقة فظيعة وكل حاجة فوق الخيال واتجوزني بعد آخر يوم في العِدّة، وأخدني الإسكندرية نزورها وقعدنا في نادي ليلي وعجبتني من هنا الأجواء دي وخدت البدلة من الراقصة، وقعدت ألحّ عليه أشتغل راقصة وأدخل المجال الفني".

وتابعت حديثها قائلةً: "هو كان أكبر مني بكتير، وكان عنده مشاكل نفسية وبيهيس شوية ومشاكل جسدية واتفاجئت بالموضوع ده ليلة الصباحية، وقلت لأهلي عنده شبه إعاقة، وهو بقى حاسس بضعف دايماً، وكان بيعملي أي حاجة يعني لو قولتله قوم أشنق نفسك كان هيشنق نفسه، وكان بيديني الفلوس اللي عايزاها ولما طلبت منه إني أدخل مجال الفن وافق، ولو رجع بيا الزمن مكنتش هكمل أبداً وفيه ستات زيي كده كتير، الفايدة الوحيدة إنه دخّلني مجال الفن بفلوسي ومدخلتوش عشان أتربّح منه".

وتحدثت صفوة أيضاً عن تفاصيل تعرّضها للسرقة والاحتيال من زوجها الثالث، الذي كان يعمل مديراً لأعمالها، فقالت: "زوجي الثالث أخد سنين عمري كلها وشبابي وفي الآخر اكتشفت إني هبلة ومكنتش متخيلة إن فيه راجل ممكن يضحك على مراته بالشكل ده، وأنا مبقتش بثق في حد بسببه، يعني لو حد بيجيبلي هدية بدون مناسبة هشك فيه".

وأضافت: "أنا اتطلّقت من زوجي الثالث ومفيش معايا لا فلوس ولا أي حاجة، وخانّي مع واحدة أنا عرفاها وهي عارفة إني مراته، كنت فاكرة إنه بيحبني وبيحافظ على شغلي، عشان كان شغّال مدير أعمالي وكان له نسبة من شغلي طبعاً، وكنت فاكره إنه بيحبني؛ لأنه كان مشغّل إخواته "بودي غارد" ليا، وأخته تساعدني في شغل البيت، وفي الوقت ده بقيت بقول هو فيه حد كده في الدنيا؟ ده مسخّرلي كل أهله يساعدوني، ولكن طلع للأسف عشان يراقبني من خلالهم، ووصلت بينا المشاكل إني اتحبست بسببه بين 11 راجل في الحجز".