أثارت الفنانة انتصار جدلاً كبيراً على مواقع التواصل الاجتماعي بعد التصريحات التي أدلت بها لبرنامج "الستات"، حول رأيها في التوعية الجنسية للأطفال في المدارس، بجانب الحديث عن انتشار جرائم القتل في الآونة الأخيرة.

وقالت انتصار: "التربية الجنسية في المدارس مهمة جداً، عشان الأطفال مايطلعوش لما يكبروا يقتلوا بعض وهمّا في الجامعة، أو يغتصبوا بعض والبنت تبقى هبلة أو هو مش فاهم".

وأضافت: "لازم نوعّي الطفل ونفهمه الثقافة الجنسية وحدود العلاقة مع الطرف الآخر، عشان متحصلش صدمة مع أول واحدة تقول له لأ فيدبحها... أنا حكيت لابني كل حاجة من ابتدائي لدرجة أن مدرّس جالهم في المدرسة يكلمهم عن الثقافة الجنسية وسأل مين عارف الكلام دا، وابني رفع إيده وقال له مامتي حاكتلي كل حاجة".

وعلّقت انتصار على جرائم القتل المنتشرة أخيراً، قائلة: "اللي بيقتل واحدة حبها مش مريض نفسياً لكن هو غير ناضج عاطفياً، وحصلت له صدمة مع أول واحدة رفضته، لكن هو مش مجرم... لو كان ناضج عاطفياً كان عرف إنه مش فتى أحلامها وكان زمانه تخطى الرفض".

وعن حقيقة تصريحاتها حول مشاهدة الأفلام الإباحية، قالت انتصار: "أنا مقلتش إني بشوف أفلام إباحية... ولكن كلامي اتفهم غلط ومحدّش فكّر يجتهد ويقول هاتوا نشوف الفيديو قالت إيه... ودا لأني مادة مثيرة للجدل وصريحة وواضحة ومختلفة، وناس كتير عايزين يطلعوا على أكتافي".