حلّت النجمة سماح أنور ضيفة في برنامج "كلام الناس" وتحدثت عن سر حفاظها على رشاقتها طوال هذه السنوات رغم أنها لا تحرم نفسها من شيء، وفاجأت الجميع بأنها لا تشرب المياه منذ أكثر من 17 عاماً.

وأكدت الممثلة المصرية أنها تتناول وجبة واحدة خلال اليوم فقط، كما تقوم بشرب كوب نسكافيه فقط عند الاستيقاظ من النوم، وقالت: "باكل كل حاجة بيتزا ومعكرونة، أنا باكل مرة واحدة في اليوم طول حياتي، من وقت ما خلصت المدرسة وابتديت أمثل، إحنا بيجيلنا البريك مرة واحدة في الأوردر وإحنا بنشتغل من 12 لـ 18 ساعة، فبناخد وجبة واحدة وخلاص وبنشتغل، فأنا بشتغل من وأنا عندي 16 سنة فعلا، ودي كانت الفترة اللي كان شغلي فيها كتير فيها فقعدت نحو 15 سنة بشتغل كتير أوي، وده كان نظام حياتي".

وتابعت حديثها عن سر رشاقتها: "بفتكر إن إحنا هناكل علشان فيه بريك بس، زائد إن أنا بحب الرياضة جدا، طول عمري رياضية، فالحكاية مخلية جسمي على طول بيحرق طول الوقت، وسواء عندي شغل ولا ما عندي شغل، أنا مبجوعش غير بالليل، أنا باكل بالليل، المهم في الموضوع ما أكلش قبل ما أنام على طول، لازم آكل قبل ما أنام بـ 5 أو 6 ساعات، وأنا نفسي مش بنام بدري، أنا مش من الناس اللي بتنام بدري، بصحى بدري لكن معرفش أنام بدري".

وفاجأت سماح المذيعة والمشاهدين بأنها لا تشرب الماء وقالت: "بقالي 17 سنة مشربتش مي، لازم المي ميبقلهاش طعم ولا ريحة، دي مواصفاتها، المي كلها ليها طعم وليها ريحة دي مبتتشربش، لما باخد منها جسمي بيضايق وبطني بتوجعني".

وأضافت: "مش لازم بس نشرب مي، أحنا بناكل فاكهة وبناخد منها المي ودي السكريات اللي بيحتاجها الجسم طول الوقت، ولو وقفت في الهواء الجلد بيشرب الرطوبة اللي في الهواء".

وتابعت حديثها: "البيزنس الأميركاني بيقول أشرب مي طول الوقت، وكل اللي شرب تعب، دا مش طبيعي، الطبيعي أن الجسم عاوز حاجة أديهاله"، مشيرة الى أن "المي المعدنية ليها طعم وفيها شوائب، وكل ما أشرب منهت أتعب لكن لو شربتها مع عصير بيبقى عادي، وفي دكاترة هتختلف معايا وأنا موافقة لأن أنا مش متخصصة أنا بتكلم عن نفسي ومش بقول للناس محدش يشرب".