حلّت الفنانة عايدة رياض ضيفة على برنامج "يلا نحلم" المذاع على قناة الحدث اليوم، حيث استنكرت الهجوم الذي يتلقاه الفنان محمد رمضان خلال الفترة الأخيرة، مشيرة إلى أنها لا تحتاج للدفاع عنه حتى تتعاون معه في عمل، مؤكدة أن لها تاريخاً فنياً كبيراً.

وقالت عايدة: "محمد رمضان ممثل عبقري، وفنان حساس جدًا، وفنان من كعب رجليه لغاية راسه، أنا ليا تاريخ ومش محتاجة إني أقول عنه حاجة علشان أشتغل معاه، ومحمد رمضان معندوش تاريخ بس هيبقى ليه تاريخ، أنا معرفش ليه فيه هجوم عليه، وهو وجهة جميلة لمصر".

وتابعت: "إحنا منعرفش الأسباب اللي خلت محمد رمضان يقول أنا نمبر وان، وهو ملهوش ذنب، هو فنان أتعرض عليه مبلغ كبير في مسلسل الأسطورة، وده كان مبلغ أول مرة حد ياخده ومكنش اللي قبله خدوه".

وأضافت: "مين قال إن محمد رمضان هاجم فريد شوقي، رمضان عمره ما هاجم حد، والناس بتاخد جملة من تعليق، وهو بيحترم الصغير قبل الكبير، وإحنا سعداء إن فيه نجم زيه عمل البهجة دي، والمفروض نحافظ عليه، وقُلت له إنت نمبر وان من غير حاجة بحب الناس".

وكشفت الفنانة عايدة رياض، عن مظاهر احتفالها بالمولد النبوي الشريف، قائلة: "بحتفل بالمولد النبوي مع أصحابي وجيراني، ولازم حلاوة المولد من وإحنا صغيرين كنا نجبيها".

أما عن صورتها أمام الكعبة، فعلقت قائلة: "صورتي في العمرة كان موضوع كبير، معرفش في حد صور صورتي وعملها كده، وبشكره، دي من أماكن ربنا الحلوة، وأنا مروحتش".

كما تحدثت عن سبب عدم حضورها جنازة الفنان الراحل هشام سليم، على الرغم من علاقة الصداقة القوية التي جمعتهما، قائلة: "أنا كنت بصور في شرم الشيخ، وطبعًا المنتج كان دافع في الأماكن اللي بنصور فيها، وهشام سليم ده غالي جدًا عليا وفنان وإنسان أصيل، أنا غصب عني إني محضرتش الجنازة، وربنا يرحمه ويصبر أهله وحبايبه".

وعن علاقتها بالزعيم عادل إمام، وكواليس مشاركتها بالعمل معه في فيلم اللعب مع الكبار، أشارت إلى أنها طالبته بالانضمام إلى الفيلم، مضيفة: "شغلي مع الزعيم فرق في حياتي الفنية، وكنت عايزة أشتغل معاه بأي شكل، وكان نفسي أكلمه وأشوفه وكنت مترددة، وفي يوم قابلته وقالي أنا شُفت ليكي فيلم "أحلام هند وكاميليا"، وعجبتيني جدًا، قُلتله يا أستاذ عادل مش هتشغلني مع حضرتك؟ قالي عنيا ليكي".

أما عن كواليس فيلم اللعب مع الكبار، فعلقت قائلة: "الزعيم ضربني علقة ساخنة في الفيلم، وفاجئني في المشهد، مع إننا عملنا بروفة صغيرة".

كما تحدثت عن سبب طلاقها، مشيرة إلى أن دورها في مسلسل "المال والبنون"، كان أحد أسباب طلاقها، معلقة: "كان البداية، وكنت في الفترة دي عايزة أنزل أشتغل ولما نزلت الموضوع مشي، وزوجي بدأ يضايق لما دخلت المسلسلات والمسرح وبقيت أرجع بالليل، وفي مرة اتخانقنا وخدت شنطتي ونزلت واتأخرت على المسرح ساعتين".

وأعربت عايدة رياض عن ندمها بسبب عدم إنجابها، قائلًا: "طبعًا ندمانة على عدم الإنجاب، لأن الست أصلًا مخلوقة علشان تخلف، لكن كل حاجة في الدنيا نصيب".