أكدت الإعلامية منى عراقي من خلال مقطع فيديو نشرته عبر صفحتها الخاصة في "فيسبوك" خبر زواجها، وشدّدت على أن زوجها "اسم يشرف أي حد، ومحبناش نعلن". نافيةً كل التكهنات والشائعات حول زواجها بالدكتور أيمن رشوان، ومؤكدة في مقطع الفيديو: "لا مش أيمن".

وقالت منى: "مساء الخير، قولولي مبروك، مكنتش أعرف أن القصة ممكن تنتشر هذا الانتشار، أنا في نص ساعة، لقيت الدنيا كلها بتكلمني من بره مصر وجوه، آه تجوزت اسم يشرف أي حد، بس ميت ألف سبب محبناش نعلن مين، واتكدرنا جداً لما لقينا الخبر تسرب بالمنظر ده".

ونفت أن يكون زوجها هو أيمن رشوان مؤكدةً: "لا مش أيمن". وبررت ربط البعض بين زوجها الجديد وأيمن رشوان قائلة: "ليه أيمن؟، لأن فرح سالي عبد السلام، أنا وأيمن مسبناش بعض، وفضلنا نرقص، مبطلتش رقص أصلاً، الموضوع وسع أن ناس قالولي هو أنت حامل، قولت لهم آه متجوزة وحامل، أنا مكنتش عارفة الخبر أصلاً، يعني لما كلّموني وقالولي على الخبر، مبروك إنت اتجوزتي، قولت لهم آه اتجوزت وحامل، بيكلّموني ويقولولي أخبار الحمل إيه؟، هو أنا أجيب عيال تاني".

وعن صداقتها لأيمن رشوان، قالت منى: "أنا أعرفه من زمان جداً، بينا كيميا، لما بنتقابل مش بنبطل نضحك ونرقص، أيمن كان دايما دعم وسند كبير، الوحيد اللي ممكن أقوله أعمل إيه؟، وبيقولي اعملي إيه، وبنفذ بالحرف اللي هو بيقوله، أنا بثق فيه ثقة عمياء ودي حاجة صعبة، أصلاً صعب جداً أثق في راجل أو يملا دماغي، أيمن من الرجالة دي، لما الخبر انتشر، أيمن قالي اتصرفي، خليهم يشيلوا الخبر ده، قولتله هتصرف".

من جانبه، نفى أيمن رشوان زواجه بالإعلامية منى عراقي، وقال في بث مباشر عبر صفحته في موقع "فيسبوك": "أنا لسه راجع من ماتش كورة وخلصت الماتش وفوجئت بخبر غريب جداً... خبر ملوش أي علاقة بالحقيقة ولا بالواقع، خبر كاذب بكل معنى الكلمة وهو أن أنا اتجوزت من الأخت الصديقة منى عراقي... منى عراقي أختي وصديقة عزيزة ولكن الخبر كاذب لأنه مالوش علاقة بالحقيقة".