حلت المطربة المعتزلة زيزي عادل ضيفة على برنامج "كلام الناس" المذاع على قناة "إم بي سي مصر"، للمرة الأولى منذ اعلانها اعتزال الغناء، حيث كشفت خلال الحلقة سبب اختيارها للداعية مصطفى حسني لاستشارته في قرار الاعتزال.

وقالت زيزي: "اخترته لدعمي في قرار اعتزال الغناء لأني بحب اسمعه وبتابع فيديوهاته من قبل الاعتزال، وبحب كلامه وهو بيتكلم عن التسامح وأمور إيجابية جدا، وبيقدر يوصلي المعلومة بطريقة حلوة وهو كلامه مريح".

وعن الاعتزال، قالت: "لما كنت مطربة وقبل الاعتزال كان شغلي الشاغل اللايكات والفيديوهات والحفلات واللبس وهاعمل شعري إزاي واسم الأغاني واكتشفت حاجة مهمة إني مش هاخد معايا في لقاء ربنا حاجة من دول".

وتابعت خلال لقائها: "مش هاخد معايا حاجة لما أقابل ربنا غير أعمالي، وكنت عايزة بيني وبين نفسي أحس أني مستعد للقاء الله، وخصوصا بعد موت ناس صغيرة على معرفة بيهم في فترة كورونا".

وتابعت: "اكتشفت أن الموت ملهوش سن ومفيش حاجة اسمها بدري، وهذا كان سر خوفي واعتزالي الغناء لأني مكنتش مستعدة أقابل ربنا".

ولفتت: "علشان أغني لازم أعمل فيديو كليب واستعين بموديل يطلع معايا وهطلع وفيه قصة ولابسة لبس معين وحاجة غلط بتحصل في النص، وعلشان أقول كلام اغنية فيه حب أو هجر أو عتاب فهذا به تحريك مشاعر للناس اللى بتسمعه، فهي الفكرة كلها حرام".

وواصلت: "وعلشان أطلع أغني على المسرح لازم ألبس فستان وأتحرك مع الموسيقى وارقص، وده طبعاً حرام، وفيه حاجة كانت بتجنني في الحفلات، وهي موبايلات الناس اللى بتصور من زوايا معينة وبيجبني ويعمل زوم على الحتة اللى هو عايزها عشان ينزل الفيديو ويكسب حبة لايكات أو فولو، فكنت معرضة أتصور على كل موبايلات الناس وأكون مباحة ومتاحة لكل الناس وده حرام".

وعن ملابسها قالت زيزي عادل: "طريقة لبسي بعد الاعتزال اتغيرت وبقيت محتشمة كتير، لكن ينقصني الحجاب بس، وإن شاء الله قريب ربنا يقويني على الخطوة دي".

يذكر أن زيزي عادل بدأت حياتها المهنية عقب تخرجها في معهد الموسيقى العربية، تعلمت على آلتي البيانو والقانون خلال دراستها بالمعهد، كما كانت بدايتها الفنية مع برنامج المسابقات "ستار أكاديمي 2" عام 2004، وانضمت إلى شركة "روتانا" وأصدرت أول ألبوماتها بعنوان "واحدة طيبة" عام 2007، كما أصدرت ألبومها الثاني "وعد عليا" عام 2009.