تحدثت النجمة ميمي جمال عن أعمالها الفنية وكشفت بعض الأسرار حول تعاونها مع النجم عادل إمام ومشاركتها له في العديد من الأعمال، منها مسرحية "مدرسة المشاغبين" لفترة قصيرة من الوقت.

وقالت جمال خلال استضافتها في برنامج "مساء dmc": "اشتغلت مع عادل إمام كتير لكن مشتغلتش معاه مسرح إلا في فترة كانوا بيعملوا بيها "مدرسة المشاغبين" وكانت سهير البابلي في دور المدرّسة وجات فترة عينيها تعبت ولازم تعمل عملية في باريس فالمؤلف سمير خفاجة الله يرحمه قال إحنا كده هنقف 15 يوماً أو نجيب حد مكانها، وقال لحسن مصطفى جوزي نجيب ميمي ولكنه رفض".

وأضافت: "قال لخفاجة حينها إنت عارف الصيّع اللي موجودين بالمسرحية سعيد صالح وعادل إمام ويونس شلبي بيقولوا إفيهات لو هي ضيعت إفيه لحد فيهم هيبصللي ويقول مراتك"، موضحة المقصود من عبارة "ضيعت الإفيه" بالقول: "الممثلة اللي بتشتغل مع كوميديان لازم تفرشله الإفيه تحس أنه هيبدأ يقول تريح ومتتكلمش والإفيه ينزل في الصالة ويتسمع لو اتكلمت هيفشل وحسن كان خايف لسعيد يتجنّن عليا، لكن الحمد لله اشتغلت 15 يوم بعد ما سمير أصر وأثّر عليه وقالّو ميمي شاطرة وهتعمله".

وتحدثت ميمي جمال أيضاً خلال اللقاء عن حضور "الزعيم" الى حفل زفاف ابنتها قبل سنوات، حيث قالت: "عادل كان بيحضر الأفراح ويعمل الواجب وزيادة لكنه اشترط عدم ملاحقة الكاميرات له عقب دخوله وقال لي حينها أنا جاي الفرح، وهتصور وأنا داخل وبسلّم عليهم، وبعدها بلاش الكاميرات تبقى رايحة جاية علينا وأنا قاعد في ترابيزتي".