كشف الفنان أحمد فهمي عن كواليس دوره في مسلسل "سره الباتع" حيث تحدث عن تفاصيل قبوله الدور رغم ابتعاده عن الكوميديا، مؤكداً أن دور "حامد" الذي جسده في المسلسل جعله يغير جلده الفني.

وقال فهمي خلال إحدى الندوات الفنية: "تجربة دور "حامد" مغامرة مختلفة، ومكنتش متوقع إني أغير جلدي في رمضان؛ لأني كنت مقرر إني هنوع بين الكوميدي واللي مش كوميدي في الأفلام بس، لكن في رمضان البيع والإعلانات بتيجي على أساس المضمون".

وأضاف: "معروف إن فهمي بيعمل كوميدي، وبيجيب فيه إعلانات وكله تمام، فكانت مفاجأة بالنسبالي لما اتعرضت عليَّ شخصية "حامد"، بس حبيت أخوض التجربة واتبسطت بيها جداً. أنا في الأول كنت ماضي مسلسل تاني كوميدي، وكلّمني حسام شوقي قالي في مسلسل مع المخرج خالد يوسف، وكان ساعتها اسمه "سر السلطان"، وكنت ساعتها بحضّر لمسلسلي الجديد الكوميدي، بس لما قعدت مع أستاذ خالد وحكالي المسلسل، قولتله تمام بس من باب الأدب محتاج أقعد مع الناس اللي أنا متفق معاهم أشوف ينفع أسيب المسلسل ولا لأ، والناس تفهمت الموضوع ومخدوش العربون حتى، فمضيت "سره الباتع"".

ثم تطرق أحمد فهمي الى الحديث عن قصة المسلسل، وحديثه مع المخرج خالد يوسف في البداية، قائلاً: "المسلسل سياسي بيناقش القضايا المصرية، وكانت أكتر حاجة اتكلم أستاذ خالد معايا فيها إن النوعية دي محتاجة تبقى مسلية عشان ميبقاش مسلسل تعليمي، لأن الأعمال اللي بتبقى كلها معلومات غصب عن فريق العمل هتقع، والناس مش هتهتم بيها أوي، وهو قدر يخلي المسلسل مسلي برغم إنه مليء بالمعلومات".

وأكد أن شخصية "حامد" لا تشبه شخصيته الحقيقية في شيء، مضيفاً: "شخصية "حامد" مش شبهي خالص لأني مليش في أجواء الأولياء، ومروحتش للسكة دي قبل كده، وحتى شكله ولبسه مش شبهي".

وعن الهجوم على المسلسل، قال فهمي إنه لو لم يكن مخرجه خالد يوسف لكان الهجوم عليه أقل بكثير، حيث وصفه بأنه شخصية جدلية، مؤكداً أنه لا يهتم لترتيب الأسماء على تتر العمل.

وتابع: "كنت بتكلم مع خالد يوسف في موضوع الهجوم ده، وهو نفسه بيقول لو كان مخرج تاني كان الضغط هيقل كتير، وهو شخصية جدلية، وأنت ممكن تحبه أو متحبوش، دي وجهة نظرك أنت كمتلقي، لكن الحقيقة إن هو مخرج نجم، بدليل إن الناس بتقول فيلم ومسلسل خالد يوسف، دون ذكر اسم البطل. لو كان حد غير خالد يوسف كان الضغط هيقل كتير فعلاً، ومينفعش نشغل بالنا بالهجوم على العمل على السوشيال ميديا قبل ما يتعرض، لأنك بتكون ما بين حملات مدفوعة، وبين ناس مش بتحب الشخص فعلاً، فبمجرد ما البوستر بس ينزل بتلاقي الهجوم بدأ، وبعد ما المسلسل ينجح هيشكر فيك، ويرجع يهاجمك على عمل تاني، وهكذا، فبقيت بشتري دماغي من كلام السوشيال ميديا".

وعن ترتيب الأسماء على تتر مسلسل "سره الباتع"، خاصة أنه عمل يضم العديد من الفنانين، قال: "أنا مضيت أول واحد وفي العقد كان مكتوب إن اسمي يتكتب في الأول، بس بعدين لقينا إن في أسامي كتير جداً، فقلت لأستاذ خالد ملهاش لازمة نكتب أسماء أصلاً، أو نكتبها في تتر النهاية".

واختتم أحمد فهمي حديثه قائلاً: "حتى لو مكتبناش كده كده الناس عرفانا، ومفيش حد ميعرفش اسمي، فمش فارق ليا فعلاً، وأكتر حاجة بكرهها لما ينزلي مسلسل ويكتبوا جملة... أحمد فهمي في مسلسل كذا، بحسها فيها تنطيط شوية، عشان الناس بالفعل عارفة إني بطل المسلسل، مش لازم أعمل كده".