كشفت الفنانة اليمينة أروى عن اسمها الحقيقي، وسر تغييرها له واستعانتها باسمها الحالي، من خلال استضافتها في البرنامج الإذاعي "الليلة عندك" مع المذيع فادي إبراهيم، وتطرقت خلال الحلقة لبعض التفاصيل الخاصة بحياتها الشخصية.  

قالت أروى: "اسمي الأصلي إيمان، وإتغير لأن أول ما إبتديت أغني في الخليج كان في فنانة اسمها إيمان، كان صعب أتمسك بيه، واخترت أروى بمساعدة أهلي والشركة اللي كانت بتنتج ليا وقتها، ولأن والدي يمنى ووالدتي مصرية حبيت اسمي يكون له علاقة باليمن، ومعروفة إن ملكة اليمن أروى الصليحي، ومعنى الأسم الراوية او الإستسقاء أي تروي العطش".

وحكت من خلال الحلقة عن موقف غريب تعرضت له بسبب أسمها قائلة: "قابلت عراف من اللي بيعرفوا الحظ بالأسماء، ورغم إني غير مؤمنة بالكلام ده لكن قالي كلام غريب، قالي إن إسم إيمان وشه مش حلو عليكي، ولازم تغيري اسمك تماماً، وكان الكلام ده قبل ما أغني، واللي حصل إن بالصدفة غيرت اسمي واتغيرت حياتي، وبطلت احب أسم إيمان، وكل الناس بيقولولي أروى، ولما حد بيقولى إيمان ما بفهموش".

وأضافت: "أنا مش من الناس اللي بتواجه نفسها في المرايا أنا بحاسب نفسي قبل ما أنام وبيكون تفكيري في الجزء الإنساني أكتر من الشغل".