في رد فعل منه على الإنتقادات الكثيرة لسفر الفنانين لتشجيع المنتخب في روسيا وتشتيتهم لتركيز اللاعبين بالإقامة في نفس الفندق والتقاط الصور والفيديوهات معهم، قال الفنان شريف منير: "وجهت لنا دعوات لحضور مباراة المنتخب المصرى أمام روسيا فى كأس العالم، ذهبنا لدعم فريقنا القومي المصري، فما الخطأ فى ذلك؟ تلقينا دعوة مثل أي مهرجان سينمائي.. عبارة عن طيران وإقامة فقط لا غير.. ولم نتلق أية مكافآت، بالعكس تكلفنا بعض المصروفات".

وأضاف: "كل ده عشان الفريق خسر، فإحنا نتحمل الموضوع يعني، هو إحنا اللي حطينا خطة اللعب؟ هو إحنا اللي لعبنا وخسرنا؟ إحنا كنا واقفين وبنتفاعل جوه الملعب زي كل المصريين الموجودين، وزعلنا لما اتغلبنا".

وتابع: "الكورة كده؛ مكسب وخسارة، إيه الغلط اللي عملناه؟ ويتقال علينا مطبلاتية ورقاصين وألفاظ مش كويسة، هو إحنا مش بنمتعكوا برضه؟ إيه الغلط اللي عملناه؟ هي مش فيفي عبده اللي أنا شاركت معاها في مسرحية حزمني كنتوا بتنبسطوا منها؟".

وتساءل: "إحنا ذنبنا إيه؟ إحنا رايحين ندعم المنتخب، حطوا نفسكو مكاننا، ولو أنت مكاننا وجت لك دعوة لحضور الماتش، بصرف النظر مين اللي طالع معاك، مش هتطلع؟ أكيد هتطلع".

وقال: "اتقال علينا كلام كبير، وإن إحنا طالعين من قوت الشعب، مش حقيقي الكلام ده، ده بند من الدعاية للشركة، وده يشرفنا إننا ندعم المنتخب، أقسم بالله إحنا مانعرف اللعيبة في أوتيل إيه، ولا شوفناهم أساسًا".

وأضاف: "الكلام جارح جدًا، معملناش حاجة مشينة، لو كنا كسبنا كنتو شيلتونا فوق الدماغ، أنا حقيقي انجرحت وزعلت، إحنا لما بنروح والله مابناخد مقابل، وأقسم بالله مرة تانية إحنا ماشوفنا اللعبية ولا نعرف مكان إقامتهم".