وجه الإعلامي عمرو أديب في برنامجه "الحكاية" المذاع على قناة mbc مصر، اللوم للفنان عمرو دياب بعد انتشار مقطع فيديو لاحتفاله بميلاد دينا الشربيني.

حيث قال: "هناك موضوع شخصي تاعبني أنا شخصياً النهاردة ستات مصر والعالم العربي طلعوا عينا، كله كاتب شفت عمرو دياب عامل إيه لدينا الشربيني دا جاي يغني لها بنفسه، بيغني لها أغنية برج الحوت، دا جاب لها تورتة يا عيني عليك يا عمرو يا بختك يا دينا، دا راح لها اللوكيشن وواخد لها تورتة عليها صورتهم هما الاتنين".

وأضاف: "يا عمرو عامل لنا مشاكل يا عمرو.. يا حبيبي خاف من الحسد لما تعمل حاجة زي دي متعلنهاش.. وبعدين هو عمل إيه.. هي تورتة بعشرين جنيه عليها صورة بخمسة جنيه، أخدت التورتة والصورة أم 25 جنيه وراح طفاها معاها.. وبعدين هو عمرو دياب لما يروح عيد ميلاد ويغني ما هي الأغنية بتاعته إيه الشيء العظيم اللي عمله عمرو دياب وعمالين بتذلونا بيه".

وقال: "يا عمرو يا حبيبي هتتحسد هتنضربوا عين يا حبيبي متنزلش فيديوهات تاني اتهرينا بهدلة وبعدين ما أي حد بيعمل تورتة يقدر يحط أي صورة عليها أنا ممكن أحط صورتي مع أنجلينا جولي على أي تورتة، وبعدين الفيديو 10 ثواني المصريين والعرب أخدوا 20 ساعة تعليقات ولايكات ويا عيني يا عمرو ويا بختك يا دينا.. الحسد يا حبيبي".