علّقت الفنانة عفاف شعيب خلال حوارها مع الإعلامية راغدة شلهوب ببرنامج "تحيا الستات" على قناة "النهار"، على خلع عدد من الفنانات للحجاب مؤخراً، فضلاً عن انتشار ظاهرة تمثيل الفنانات بالباروكة بدلاً من الحجاب.

أوضحت شعيب أنها انزعجت للغاية من خلع الفنانتين شهيرة وسهير رمزي للحجاب، قائلة: "الاتنين دول بقالهم 27 سنة محجبات.. ليه؟ بعد 27 سنة بتقلعوا ليه؟ كملوا.. بس هو كل واحد حر.. لكن زعلت لأنه بعد السنين دي كلها الناس كانت الناس حباهم بالحجاب، وهما ما شاء الله حلوين، معرفش إيه اللي خلاهم يعملوا كده؟ أكيد حد وسوس لهم وقالهم حجاب إيه".

وتابعت أنهما لو خلعتا الحجاب قبل أكثر من 10 سنوات من الآن لما انزعجت لهذه الدرجة، "لكن دلوقت وفي السن ده؟!" على حد تعبيرها.

وعن أزمة خلع الفنانة حلا شيحة للحجاب، أكدت أنها لم تتقبل خلعها للحجاب وانتقالها المفاجئ من اللبس المحتشم لعكس ذلك، مضيفة: "طب لبستيه ليه؟؟ عشان كنتي مقتنعة بيه ولا عشان منظر ولا إرضاء لعريس جديد جايلك وقالك اتحجبي؟.. مينفعش، يا تلبسيه وأنتي مقتنعة إنه فرض من فروض ربنا سبحانه وتعالى يا متلبسيهوش".

استطردت: "حلا ربنا يردها إليه رداً جميلاً.. بس حتى لو قلعتيه التزمي باللبس إنتي ذقتي طعم الطاعة والالتزام، فالتزمي بحدود معينة مينفعش تقلعي كده مرة واحدة.. أنا لو دفعولي مليار دولار لا يمكن أقلعه خلاص ده اتفرض عليا مش لعب عيال".

وأضافت، أنه في فترة ارتداء عدد كبير من الفنانات الحجاب انطلقت شائعات أنهن تقاضين أموالاً من أجل ارتداء الحجاب، لكن هذا غير صحيح، مشيرة إلى أنهم يعطون المال كي تخلع الفنانة الحجاب وليس لارتدائه.

مشيرة إلى أنها لم تقابل حلا أو تتحدث معها وحتى إن التقت بها لن تكلمها في أي شيء في النهاية هي حرية شخصية.