استضافت الإعلامية إسعاد يونس خلال برنامجها "صاحبة السعادة"، الذي تقدمه على شاشة "DMC"، الفنان رامي جمال، الذي تحدث عن وعده لفتاة مصابة بمرض البهاق، بالغناء في فرحها، حيث ذكر أنه أثناء حديثه عن مرض البهاق الذي أصابه هو الآخر، وجد منشوراً من الفتاة تأثر به بدرجة كبيرة.

وقال إن الفتاة قالت في المنشور: "نفسي جدًا أتعالج منه، عشان مش كل الناس بتتعامل معاه إنه مرض عادي، فيه ناس بيفكروه مرض معدي، واتعرضت لأكثر من موقف، منهم ميكب أرتست يوم خطوبتي كانت خايفة أكون معدية، وكانت عاوزة تستخدم أدوات تانية ليا مخصوصة عشان محدش يتعدي".

وأضاف: "يعني الفتاة اللي جاية تساعدها عشان تخبي البهاق ده يوم خطوبتها جات كملت عليها وقتلت مشاعرها".

وأشار رامي إلى أنه سيتحدث عن مرض البهاق دائمًا، وأن الدعم و"الطبطبة" الذي أتت إليه من جمهوره والمتعاطفين معه بعد مرضه سينقلها لكل مرضى البهاق، مضيفًا: "أنا اتمنيت إني أحضر فرح الفتاة دي وإن شاء الله ربنا يكملها على خير عشان أوفي بوعدي، وهغني ليها كل الأغاني اللي هي بتحبها، وأغنية أوعديني، وكل الأغاني اللي هتخليني أشوف ضحكتها، أنا لما قولت للفتاة كده وشوفت فرحتها حسيت أني بقى ليا دور مختلف عن الغناء".