نجوم لبنان... حزن على بيروت وغضب بوجه السلطة: "اذا عندكن شرف بتستقيلوا"

عبّر عدد كبير من النجوم اللبنانيين عن حزنهم الشديد وغضبهم من الأداء السلطوي في لبنان، جرّاء الانفجار الضخم الذي عصف بالعاصمة اللبنانية بيروت امس (الثلثاء)، وأوقع عشرات الشهداء والجرحى.

وصدر أعنف منشور من مايا دياب التي قالت: "في واحد عايش عم يتحكم بالبلد من تحت الأرض وضلّ لحتى حطّنا كلنا والبلد تحت الأرض.. #دولة الكلاب والحيوانات الناطقة... دولة ليه اصلاً هيدي دولة... البكاء لا يكفي... بدنا ياكن جثث وبس جثث".

وغرّدت هيفاء وهبي قائلةً: "اللي صار اليوم ب #بيروت بيبكّي الله يرحم كل الضحايا، وكل حدا قادر يتبرع بالدم للجرحى ما يتردّد ولا لحظة لأنن كتار".

وكتبت اليسا: "محروق قلبي من جوا ومقهورة عا بلدي من اللي صار. أنا الحمد لله بخير وانشالله ما يكون في شهدا، وكل الجرحى يتعافو يا رب! بيتي تكسر كلو بس مش مهم، المهم. الله يحمي لبنان".

وعلّقت سيرين عبدالنور: "الله يحمينا من الشر يللي حاطت عينو علينا...".

ونشر عبدو شاهين: "شو تقيل هل الصبح، شو صعب هل اليوم".

وكتبت كارول سماحة: "كيف بعد بيقدروا يحطوا راسهن على المخدة ويناموا؟، صدّقوني اتخطينا مرحلة الفساد من زمان... الله يخفف من وجع الناس، مش قادرة لاقي كلام يعبّر عن اللي عم حسو".

وقالت نوال الزغبي: "ليلة سوداء وحزن عميق عم بتعيشو #بيروت. هيدي الليلة محفورة بذاكرة اللبنانية".

وكتبت إيميه صياح: "دخيلك يا رب.. دخيل اسمك.. لبنان تحمّل كتير.. وما بقى قادر يحمل أكتر.. يا رب ترحم اللّي سبقونا، وتبرّد قلب أهلهم، تشفي الجرحى والموجوعين، وترحم اللّي بعدن بهالدني.. يا رب يخلص هالكابوس.. كتير هيك كتير..".

وغرّد وسام حنا: "اذا عندكن شرف يا بلا شرف بتستقيلوا من كبيركن لصغيركن. شو بدكن بعد يا بلا شرف، انفجار بيروت الليلة طلع غلطة و إهمال، غلطة يا بلا شرف، ما حدا يطلع منكن على التلفزيون ويحكي".

وكتب باسم مغنية: "أشكر كل حكوماتنا السابقة والحالية على الإهمال. أصبحتم أخطر من العدو الصهيوني. شكراً".

وعلّقت نيكول سابا: "ولا كأنو مشهد من الأفلام السينمائية، شي مرعب وحزن رهيب ما بينوصف على هالبلد كيف صار!! هيدا النهار ما رح ينتسى وحاسة بشعور كتير بشع! أعداد جرحى مهول والمستشفيات مش مستوعبة. أساساً البلد غرقان بموضوع كورونا، الله يستر ويشفي كل المنصابين ويخلّصنا من كل يلّي عم بصير".

وحرصت الفنانة مايا نصري على نشر صورة من الانفجار عبر حسابها الشخصي في موقع "إنستغرام"، وكتبت: "أصدقائي في لبنان طمّنونا عليكم، أنا وعائلتي بخير".

نادين نسيب نجيم أُصيبت في انفجار بيروت وتخضع لعملية جراحية طوال 6 ساعات