بعد إعلانه عن فتاة أحلامه... هجوم على رامز أمير والأخير يرد

نشر الفنان الشاب رامز أمير على حسابه الخاص في "فيسبوك" صورته مع فتاة، وعلّق عليها بقوله: "آسف إني هستخدم الأكونت لحاجة شخصية يمكن متهمكوش، بس دي حاجة هتفرح أهم حد في حياتي"... وأضاف: "بصي بقه، إنتي أجمل وأطيب وأحن واحدة عينى شافتها، إنتي دعوة دعيتها لربنا واتقبلها مني وبعتك ليا، أنا بقولك قدام الدنيا كلها إني بحبك، كل الناس بيخبوا وش ولادهم في الصور بس أنا هخبيكي إنتي عشان إنتي مش بس حبيبتي، إنتي بنتي وأجمل نعمة ربنا بعتهالي، ربنا يخليكي ليا يا بأَليلو".

وأخفى رامز وجه حبيبته في الصورة، ليفاجأ بسيل من الانتقادات والهجوم من الجمهور الذي استنكر تعريفه لها بأنها حبيبته بدون ارتباط رسمي، فضلاً عن إخفاء وجهها مع إظهار أجزاء من جسمها في الصورة بشكل فج، على حد تعبيرهم.

وردّ رامز على تلك الانتقادات كاتباً في منشور آخر: "والله أخلاقي متسمحليش أرد على الكلام اللي اتكتب ده.. بجد مش عارف أقول إيه على المستوى اللي وصلناله.. خدوا بالكم من عيالكم يا جماعة، ربوهم كويس علموهم الأدب والاخلاق، علموهم يبقوا بني آدمين ميبقوش حيوانات".

وتابع: "علموهم يبقوا رجالة عندهم شجاعة ميستخبوش ورا شاشة، فهموهم إن ربنا بيحاسب على الكلمة اللى هما مستهترين بيها دى.. متخلفوش ولاد لو مش ناويين تربوهم عشان ربنا هيحاسبكم أنتم كمان على أخلاقهم".

يُشار إلى أن رامز أمير شارك في سباق دراما رمضان 2020 كضيف شرف في مسلسل "الاختيار"، الذي قام ببطولته أمير كرارة وأحمد العوضي ودينا فؤاد وسارة عادل وضياء عبد الخالق وعدد كبير من ضيوف ‏الشرف.