خرجت أخيراً دارين حلمي، خطيبة الفنان تامر عاشور السابقة، عن صمتها لتردّ على الأقاويل التي انتشرت أخيراً بشأن ارتباطها به وهو لا يزال متزوجاً. وقالت دارين عبر حسابها في "إنستغرام": "بسم الله الرحمن الرحيم يَا أيُّهَا الَّذِينَ آمَنُوا إن جَاءَكُمْ فَاسِقٌ بِنَبَإ فَتَبَيَّنُوا أن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ صدق الله العظيم".

وأضافت: "نظرًا لاتهامات وإشاعات اتوجهت لي الفترة اللي فاتت وبدون وجه حق فكان لازم أخرج عن صمتي وأوضح موقفي لأن مش دارين اللي تاخد راجل متجوز أو تكون سبب في خراب بيت حد، وبالتالي مليش ذنب في أي حاجة تامر دخل البيت من بابه واتقدم لأهلي رسمي على أساس أنه مُطلق وده اللي أنا كنت فاهماه زيي زي جمهوره - عادي إن بنت ترتبط براجل مُطلق مش أزمة- وحصلت الخطوبة بشكل رسمي زي ما عرفتوا ومشيت الأمور في مجراها الطبيعي لحد ما بالصدفة اكتشفت إنه لسه زوجته على ذمته، وفيه قضايا بينهم ولم يتم الانفصال بشكل رسمي".

وتابعت: "أي بنت في الموقف ده طبعًا لازم تنسحب مهما كان الحب ومهما كانت العواطف، لأن مش دارين حلمي اللي تاخد راجل من زوجته مهما كان هو مين، كده كده أنا كنت مستمرة في مسابقات ملكات الجمال وليا الكاريير الخاص بيا، فكل مرة بقرر الانسحاب كان تامر بيرفض وإن كده كده الطلاق قائم سواء أنا في حياته أو لأ وده مش يخصني في شيء".

وأردفت دارين قائلةً: "وفي الآخر أنا صممت على فسخ الخطوبة بمنتهى الاحترام ما بيني وبينه، لأنه مينفعش وكل التوفيق والنصيب بإيد الله، ربنا يوفقه في حياته ويوفقني في خطواتي الجاية إن شاء الله، تامر إنسان محترم مشفتش منه غير كل خير واحترام وحب وأنا بحترمه على المستوى الفني والشخصي، لكن ده نصيب وربنا يوفقه في حياته وأتمنى محدش يتكلم في حاجة ميعرفش تفاصيلها، وشكرا لكل الناس اللي بتحبني وعارفاني كويس، أظن أنا جاوبت على كل حاجة ومش هفتح الموضوع ده تاني نهائي أرجو احترام موقفي".

وكانت سمر أبو شقة زوجة المطرب تامر عاشور قد كشفت عن طلبها الطلاق من زوجها من خلال أسئلة عدة طرحها عليها متابعوها عبر حسابها في "إنستغرام"، وردّت على هذه الأسئلة بإجابات متشابهة، وهي إصرارها على الطلاق، لأن الحياة الزوجية عِشرة وتفاهم وليست صوراً تُنشر عبر السوشيال ميديا، مشيرةً إلى أنها شعرت بالخيانة بعد إعلان تامر عاشور خطوبته على دارين حلمي وهي لا تزال على ذمّته.

كما أكدت أن الحب قد ينهيه موقف واحد بين الطرفين، وأنها تحاول الحصول على الطلاق منذ أكثر من عام ولكنها لم تستطع ذلك.