رسالة قوية من تامر حسني للجمهور

كتب النجم المصري تامر حسني على حسابه الخاص في "فيسبوك" منشوراً طالب فيه جمهور قطبَي الكرة المصرية "الأهلي" و"لزمالك" قبل انطلاق مباراة القمة في نهائي إفريقيا، بضرورة التخلّي عن التعصب الكروي والتحلّي بالروح الرياضية. وجاء في المنشور: "رأيي الشخصي المُتواضع..... مهما اتكلمنا كلنا في الروح الرياضية الجميلة في كرة القدم مش هيكون كلامنا مؤثر زي أصحاب الرياضة نفسها، يعني لو صداقتهم الطيبة تبان في العلن من خلال بوستات فيها سلام بين اللاعبين هتخليهم ينقلوا الروح السلمية دي للناس ولكُل الجماهير، ولو أثناء المباراة حد خبط حد يعتذرله ويطّمن عليه، الناس فوراً هتفرح بالروح دي والروح دي هتنتقل للبيوت وللجماهير ومش هيكون في أي نزاعات".

وأضاف: "ولو المباراة خلصت وكل لاعب جري حضن لاعب من الفريق التاني فعلاً هيخلوا الناس في البيوت وكل مكان في نفس حالة السلم اللي هيصدروها، حتى لو إدارة كل نادي ألزمت كل فريق بالروح دي إجباري لإن ولادنا يستاهلوا إنهم مايكرهوش بعض ولا يتخانقوا بسبب رياضة المفروض إنها بتجمع الناس، مش منطقي برضو كل ماتش الناس تحس إن في حرب هتحصل!! وبين مين!! أهم وأعرق الأندية المصرية اللي مشرفينا في كل الدنيا".

واختتم بالقول: "يارب كل الخير ليهم ولأولادنا وللجماهير العظيمة المخلصة، زمالك أو أهلي يعني مصر والدنيا كلها بتتفرج النهاردة على أولاد مصر وبعون الله هنرفع راس مصر لإن النتيجة أياً كانت فهي مصرية".