بعدما فأجات الفنانة المصرية نجمة برنامج المواهب "ستار أكاديمي" لارا اسكندر منذ أيام قليلة جمهورها بخبر ولادة طفلها، كشفت سبب إخفاء حملها من خلال رسالة نشرتها عبر حسابها في تطبيق الصور والفيديوهات "إنستغرام"، وقالت فيها إنها تلتزم بعض الحدود في ما يتعلق بنشر أخبارها الخاصة، وقد وجدت أن وقت الولادة هو الموعد المناسب لإعلان ذلك. وكتبت في الرسالة: "2020 كانت سنة كلها أحداث غريبة وما كانتش سهلة على ناس كتير وأنا واحدة منهم. بس في بدايات السنة اكتشفت إن ربنا بعتلي هدية و نعمة ملأتني بالأمل. كنت دائماً عارفة إني مش هأعلن الخبر إلا في الوقت المناسب لأن ما فيش حاجة أكتر قدسية من إن إنسان صغير يكون بيكبر جواك. والوقت المناسب هو دلوقتي". وأضافت: "مش قادرة أشرح كم المشاعر اللي حاسة بيها، بس ممكن أقول إن قمة السعادة والفرح (مع شوية تعب وإرهاق) مش تعبيرات كافية لإحساسي دلوقتي".

واختتمت لارا رسالتها بالقول: "دائماً بحاول أشارككم أخباري على قد ما أقدر، بس دائماً برضه باحرص على إن تكون في حدود ثابتة لما تكون الأخبار متعلقة بحياتي الشخصية وحياة عائلتي. ودلوقتي وأنا بابدأ حياتي الجديدة كأم، باسألكم إنكم تتفهموا إني هافضل متمسكة بالحدود دي ومتمسكة بخصوصية حياتي وحياة عائلتي وأتمنى إنكم تتمنولنا السعادة في حياتنا الجديدة. أنا مبسوطة جدا إني بشارككم الخبر ده، حتى لو كان متأخر بـ9 شهور".