بالفيديو - الكشف عن حالة عمرو أديب الصحية بعد الحادث: "يعاني من آلام مبرحة"

طمأنت الإعلامية لميس الحديدي الجمهور على الحالة الصحية للإعلامي عمرو أديب بعد تعرضه لحادث مروري مساء الثلاثاء الماضي.

وقالت الحديدي عبر برنامجها "كلمة أخيرة" المذاع على قناة "ON"، أمس (السبت): "عاوزه أتكلم في موضوع مالوش علاقه بالشغل، عاوزة أطمن كل الناس اللي بتسأل على عمرو بعد الحادثة الصعبة اللي تعرض لها مساء الثلاث الماضي، إنه الحمد لله بخير بشكل عام ربنا نجاه بأعجوبة الحقيقة لأن العربية اللي خبط فيها واللي وقفت فجأة، كانت محملة بأنابيب بوتاجاز فكان ممكن تنفجر في أي لحظة".

تابعت: "الدكاترة طمنونا على حالته عموماً، لكن هو لسه بيعاني من آلام مبرحة غالبا من الكدمات والرضوض نتوقع إنها تاخد بعص الوقت، وإن شاء الله يحاول يرجع لجمهوره قريباً بإذن الله، لكن هو محتاج يستريح شوية علشان يقدر يرجع تاني، وأنا طبعا ماكنتش هقدر أنزل الشغل أو أكون معاكم إلا وأنا مطمئنة عليه إنه بيتماثل للشفاء، وإن حالته تسمح إني أسيبه بعض الوقت، لأن في مثل هذه الأحداث دوري كزوجة بييجي قبل دوري كإعلامية".

ووجهت الإعلامية الشكر للجمهور ولكافة المسؤولين في الدولة قائلة: "عاوزة أشكر كل الناس اللي سألوا علينا وعليه من أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسئولين في البلد بشكرهم جميعا، زملاءنا الإعلاميين، الفنانين من كل الوطن العربي، الدكاترة اللي كانوا بيكلموني، وطبعا أصدقائي وأصدقاء عمرو اللي ماسابونيش لحظة واحدة. باعتذر إني ماكنتش بأرد علي الاتصالات، لكن ممتنين جداً لاهتمامهم، وحبهم اللي حسينا بيه".

شارك