خلال حواره مع الفنانة مي عمر ضمن برنامج "بصراحة مع" المُذاع على قناة MBC1، كشف الفنان أحمد زاهر أنه فكّر في التخلص من حمل زوجته بابنته الثانية ليلى، بسبب الظروف الصعبة التي كان يمر بها في ذلك الوقت... وقال: "بعدما تزوجت وأنجبت ابنتي الأولى ملك، كنا عاملين كل الموانع، وبعدين فجأة هدى حامل في ليلى، بقيت قلقان وخايف أفشل في تحمل المسؤولية. مكانش عندي شغل السنة دي أو رفضت حاجات، لأ أنزله. هدى كانت رافضة تماما تنزل البيبي، وأنا قلت بيبي تاني في الظروف دي حاصرف عليه إزاي".

وأضاف: "فضلت كده لغاية ما أمي كلمتني مرة في التليفون، وقالت لي حلمت حلم، جالي هاتف بالآية «ولا تقتلوا أولادكم خشية إملاق»، دي عطية من عند ربنا سبحانه وتعالى وإنت ترفضها، إنت مجنون. الجملة دي أثرت فيَّ قوي وحسيت برعشة، وقلت خلاص حسيبها على الله."

وأردف قائلاً: "وأنا بأدخل مع مراتي غرفة العمليات. أول ما اتولدت ليلى نزلت زرقا، والحبل السري مربوط حوالين رقبتها، ومن غير صوت، مرت علي دقيقتان كسنتين، وشريط سينما في حياتي، كنت حاضيعها وأهي ضاعت، حأقول للست دي إيه. لغاية ما عيطت ولونها بدأ يفتح وأنا عيطت، لدرجة إن الدكتور قال لي أرجوك خد بنتك وإطلع بره. كانت تجربة صعبة وقاسية جداً، وأحمد ربنا سبحانه وتعالى إني ما أخدتش القرار أنزل البيبي، وليلى أجمل حاجة في حياتي".