شقيقة أحمد السقا تردّ على كلام مها احمد وتكشف الحقائق

ردّت فاطمة، شقيقة الفنان أحمد السقا، على منشور الفنانة مها أحمد الأخير، والذي هاجمت فيه نجمين كبيرين شاركا في دراما رمضان لهذا العام، وعلى الرغم من عدم ذكر اسميْ النجمين، إلا أن الجمهور شك أنها توجه الحديث لكل من أحمد السقا وأمير كرارة.

وقالت فاطمة السقا من خلال صفحتها على "فيسبوك": "الكلام ده موجه ليكي يا أستاذة، بدل ما تفضلي تمسحي ردي كل شوية.. أبهرتيني يا مها بأخلاقك العالية، وبأنك افتكرتي العيش والملح اللي كلتيه في البيت بتاع الفنان اللي مش عارفة تقولي اسمه بس عرفتي تقولي عليه (ندل) اللي هو أحمد السقا.. بس أنا باقولك قدام الناس، قطع لسان أي حد يقول عليه كده لأنه راجل أكرمك ووقف جنبك أنت ومجدي بدل المرة ألف".

وأضافت: "وأمير كرارة برضو راجل جدع ومحترم للي ما يعرفهوش في البوست بتاعك ده.. معرفش إيه الفرص اللي كانت عندك اللي كان يتمني يشتغل معاكي فيها زمان، بس هو أي حد يتمني يشتغل معاه دلوقتي أكيد.. وكلمة الدور بينادي صاحبه دي بتاعة أفلام.. ما بتتقالش في الحقيقة.. كفايا دراما وتشويه للناس".

وتابعت: "وبعدين هما كممثلين مش مطالبين يقفوا جنبك ولا يجيبولك أدوار على فكرة.. دي رؤية مخرج وناس بتوع كاستنج، الحقيقة أنا مش عارفة أنت عايزة إيه.. أنا مش شايفة بعد العشرة الطويلة اللي أنت قولتي عليها غير كمية الحقد والسواد والشماتة اللي كانوا متداريين ورا ابتسامة كدابة، معرفش أنت إزاي كنتي بتدخلي بيوتنا الصراحة وأنت ست وحشة كده".

واختتمت كلامها قائلة: "نسيت أقولك السب والتطاول ده بيدل علي الأصل.. وإحنا بقي ولاد ناس، مع أننا عندنا كلام كتير أوي يتقال".