بالفيديو - هاني شاكر يردّ على الجدل حول إنشاء شعبة لمؤدّي المهرجانات

خلال مداخلة هاتفية مع الدكتور معتز عبد الفتاح مقدّم برنامج "تحت الشمس" عبر قناة "الشمس"، ردّ الفنان هاني شاكر، نقيب المهن الموسيقية على الجدل الدائر بين أوساط الفنانين حول إمكانية تأسيس شعبة لمطربي المهرجانات داخل النقابة مثل مطربي الراب، فقال: "الراب له شعبة في النقابة من زمان مش من دلوقتي خالص، ودلوقتي الولاد دول كتروا لأنه بقى موجة من الموجات الفنية اللي الشباب بيحبوها ومنتشرة، وأنا وزملائي في المجلس قررنا إن كل من ينجح في هذه الشعبة يمضي تعهد على الالتزام بكل ما يقوله أو يصوّره، والمخالف يسحب منه التصريح".

وأضاف: "بالنسبة للمهرجانات، المهرجانات مشكلتها إنها معتمدة على الإسفاف والخروج عن المألوف وعدم الالتزام بالقيم والعادات والتقاليد، هما مش بيقولوا غير الكلام اللي يلفت النظر، هما مش معاهم لا فرقة ولا مزيكا ولا أي حاجة إلا الإيقاع والكلام الملفت للنظر، وللأسف الكلام دايماً بيبقى خارج".

واستطرد شاكر موضحاً: "للأسف معظم بتوع المهرجانات فعلاً مش بيعرفوا يغنّوا ولا يؤدوا حتى، دول ملهمش علاقة بالغناء، هو الغناء بالعافية؟ أنا عايز أبقى دكتور هبقى دكتور بالعافية؟ عايز أبقى رسام هبقى رسام بالعافية؟ أكيد لأ".

وذكر هاني شاكر أن النقابة نسّقت مع جهات عدة في الدولة في ما يتعلّق بقراراتها ضد مطربي المهرجانات، موضحاً: "التنسيق مع المصنفات الفنية على أكمل وجه، التنسيق مع قاعات العرض في كل مصر على أكمل وجه، وهناك تنسيق مع جهات أخرى أعلى بالدولة... الباب مفتوح مع مطربي المهرجانات اللي هيحاولوا يصلحوا من نفسهم ويقدموا حاجة جميلة ويكونوا صالحين أساساً يكونوا مطربين... حمو بيكا إحنا اديناله مدرّس على حساب النقابة كان بيعلمه، وإحنا لا نتقاعس مع أحد، لكن في ناس ربنا لم يمنحهم الموهبة، والموهبة مش بالعافية".

واختتم هاني شاكر بالقول: "اللي يقف على المسرح لازم يكون عضو نقابي ويزاول المهنة، مش أي حد يقول أي حاجة، والنقابة هتفضل دايماً تقف مع أعضائها، وبالنسبة للناس اللي مش أعضاء بنقول للي عايز يتقدم للاختبارات يتفضل، والحمد لله إن ربنا جعلني سبب لفرحة الناس وتنقية الأجواء الغنائية في مصر".