محمد عطية يعترف بموقف طريف تعرّض له بسبب تامر حسني

حكى نجم "ستار أكاديمي"، الفنان محمد عطية من خلال منشور عبر حسابه الخاص في "إنستغرام" موقفاً طريفاً حصل له مع المطرب تامر حسني، في مرحلة الدراسة في الثانوية العامة، عندما كان عطية مهتماً بتأليف وتلحين الأغاني، وكان تامر في ذلك الوقت في زيارة لمدينة طنطا لتصوير أحد البرامج، فذهب عطية متحمساً للقاء تامر حسني ومعه كلمات أغنية ليعرضها عليه، لكنه لم يتمكن من ذلك.

وكتب عطية قائلاً: "وأنا فى تانية أو تالتة ثانوى تقريباً كان تامر حسني لسه منزّل أغنية "حبيبي وأنت بعيد"، وكانت الأغنية مكسّرة الدنيا، وأنا كنت بحب تامر جداً وما زلت بحبه، وعرفت في يوم من أحد الأصدقاء إن تامر جاي عندنا طنطا عشان يستضيفوه في القناة السادسة، وأنا كنت معروف وسط أصحابي إني بكتب وألحّن، وساعتها مكنش فيه سوشيال ميديا، فقررت أروح القناة عشان أقابله واسمّعه أغنية أنا كنت كاتبها وملحنها وكل اللي أعرفهم ساعتها قالولي حاول تسمّعها له".

وأضاف: "المهم روحت وبعد زن وانتظار، حد من اللي في القناة ادّاني رقم تامر وقاللي كلّمه سمّعها له، مشيت وأنا في قمة السعادة، وتاني يوم نزلت على كابينة ميناتل واتصلت بالرقم، رد عليا واحد وقلتله ممكن أكلّم تامر حسنى، قاللي أنا مدير أعماله وشرحتله الموضوع، فقالي أنا بسمع الأغاني وبختارهاله، وبعد ما سمّعتوا الأغنية قالي هرجع أكلّمك".

وتابع قائلاً: "فضلت أكلّمه على مدار أسبوعين يوم آه ويوم لأ، لحد ما اكتشفت إن ده مش رقم تامر، وإن الراجل اللي في القناة كان بيستغلّني، وبعد "ستار أكاديمي" اتعرفت على تامر وشوفت بعيني إنه جدع جداً وبيساعد أي حد موهوب، بس عمري ما افتكرت أحكيله القصة دي، وكنت ناسيها تماماً لحد النهاردة وأنا بقلّب في الورق لقيت الأغنية، طبعاً الكلام كان ناقصه خبرة وكان من عشرين سنة تقريباً بس حابب أشارككم معايا الكلمات".

ونشر محمد عطية بعض كلمات الأغنية، والتي تقول: "وبتقولولي إرجعلها، بتفكّروني بحبها، دا انا ياما نزلت دموعي منها، وعايزة ترجع، ومصدقينها؟، لأ صدقوني ده مش حنينها، ده غرور ومالي قلبها، وبتقولولي إرجعلها، سيبوني وحدي مرتاح ضميري، أنا كده راضي في بعدي، زي ما كان في قبلي غيري، هيكون أكيد في برضو بعدي، لا أنا أول حبايبها، ولا آخر حبايبها، ومش شوقها اللي جايبها، جاية تكمّل كدبها، وبتقولولي إرجعلها".

مقالات ذات صلة

تامر عاشور يوضح حقيقة تقديمه دويتو غنائياً مع شيرين عبد الوهاب (فيديو)

تامر حسني يكشف عن حفله الأول بعد تجاوزه أزمته الصحية

محمد عطية نجوم الفن تامر حسني