نشرت الفنانة إنجي وجدان عبر حسابها الخاص في "فيسبوك" مقطع فيديو حذّرت فيه متابعيها من التعامل مع إحدى شركات الأثاث الشهيرة في مصر؛ حيث إنها تخدع عملاءها وتستولي على أموالهم على غرار ما حدث مع شقيقها.

وظهرت إنجي في مقطع الفيديو وهي تحذّر من التعامل مع كل الشركات التي يملكها هؤلاء الأشخاص، وعلّقت على الفيديو بالقول: "شركة أثاث أخدت فلوس من أخويا، وعملاء كتير، وبعدين قفلوا كل وسائل التواصل".

وأضافت: "عاملة الفيديو ده تحذيري علشان فيه كذا حد واقع في نفس المشكلة، الشركة دي شركة بتاعت أثاث، المهم الشركة دي أخويا أتعاقد معاهم على أوضة يعملوها له في شهر 6 اللي فات، وفضلوا يكلّموه لغاية ما أخدوا 90% من تمنها، وقعدوا يماطلوا ولحد دلوقتي مسلمهوش حاجة ولا رجعوله فلوسه، ودايماً أعذار ملهاش لازمة".

وتابعت: "أخويا قعد معاهم كذا مرة، وفجأة قفلوا ومش بيردّوا، لكنه عرف يوصل للشركاء"، كما ذكرت مجموعة من الشركاء المالكين للشركة، لافتةً الى أن كلاً منهم تهرّب من العملاء على حد وصفها، كذلك كشفت عن أسماء بعض شركات الأثاث التي يملكها نفس الأشخاص.

واختتمت إنجي وجدان بالقول: "بيحاولوا يساوموهم بعروض وهمية، زي كتابة شيك للعميل بنصف الثمن، وفيه مجموعة من العملاء رايحين يتقدموا بشكوى رسمية ضدهم"، مشدّدةً على ضرورة توخّي الحذر وعدم الانخداع بالأشكال الجذابة للأثاث المنزلي على السوشيال ميديا، والامتناع عن شرائه من هؤلاء الأشخاص.