بالفيديو - نور اللبنانية عانت من الاكتئاب وترفض إظهار طفليها لهذا السبب

حلّت الفنانة اللبنانية نور ضيفةً على برنامج "صاحبة السعادة" الذي تقدّمه الفنانة إسعاد يونس على قناة dmc، حيث كشفت عن شعورها بعد إنجابها لطفلين وكيف تأقلمت مع الأمومة، وسبب إخفاء طفليها عن مواقع التواصل الاجتماعي.

وقالت نور: "أنا اتغيرت كتير من بعد الخلفة والشغل، وكنت بتكسف جداً جداً، بس بدأت أتعود وأكون أجرأ، وأول سنة أمومة كانت صعبة، وكان عندي اكتئاب بسبب المسؤولية والحبسة ومفيش أجازة من المسؤولية هو مش فيلم نخلّصه ونرتاح، دا طفل مسؤول منك 24 ساعة".

وأضافت: "وبعد كدا اتعلّمت واتمرّنت ولما خلّفت تاني كنت فاهمة كل حاجة ومكنتش بحب أسيب ابني لحد ولا ماما ولا أي حد، ومرة صعبت عليا نفسي أوي ومكنش فيه حد بيساعدني واتبهدلت كتير".

وتابعت قائلةً: "مبحبش أعرض أطفالي على السوشيال ميديا، هو مش عيب بس بحس إنهم صغيرين على الشهرة وأنا عايزاهم مشهورين عشان حاجة هما عملوها مش عشان أهلهم، وأنا والسوشيال ميديا مش أصحاب أوي، وابني ليو بيحب الشهرة وعشان كدا مش بفتحله السكة دي وبراقب كل حاجة بيعملها".

واختتمت نور حديثها مؤكدةً: "ليو ابني شبهي جداً، هو صريح ومش بيخبي أي حاجة ومش بيعرف يجامل وأنا كدا، إنما بنتي واخدة من باباها جداً، وبتتكسف وخجولة ومش بتحب الشهرة ولا تحب تبان وبتشتغل بضمير وبتوصل للي عايزاه، وأنا بربّي ابني زي ما بابا رباني وبعلّمه يعتمد على نفسه وياخد قراراته بس بردو لازم ياخد رأيي الأول".