حلّت الفنانة انتصار ضيفةً على برنامج "العرافة" الذي تقدّمه الإعلامية بسمة وهبة على قناة "المحور".

وقالت انتصار خلال اللقاء إن علاقة وطيدة تجمعها بالفنان محمد رمضان: "مزعلش مني لما قلت إنه مش نمبر وان، وعلاقتي قوية به بدرجة أكبر من إنه يزعل منه".

وأضافت: "أنا بمثل له حاجة مهمة، وهو يمثل لي ذكرى مهمة ذكرني بها، كان لسة مش معروف وصغير شوية عن كده، كان بيمشي مع صاحب شبهه أوي في مسرح البالون، وكان بشنطة هاندباغ على كتفهم كأنهم خارجين من المدرسة".

وتابعت قائلةً: "دخلوا مسرح البالون، كنت واقفة مع الفنان الراحل إبراهيم نصر، والمخرج الراحل محسن إبراهيم جوه الخشبة، ولقيت 2 صغيرين ورفيعين، كنا بنعمل حاجة للشغل، وأنا الوحيدة اللي انتبهت لمحمد رمضان وصاحبه، فقالي إحنا بنلف في المسارح وبندور على شغل وفرص، وقلت له أنت عاوز تعمل إيه، إحنا بنعمل بروفات وممكن المخرج يزعق".

وأردفت: "محمد رمضان كان عارف إن ده محسن حلمي وقالي عاوزين نوري له إننا بنعرف نمثل، فاستأذنت المخرج، ولما لقاني متحمسة قالي هاتيهم، قلعوا الشنط وقلّد أحمد زكي أو محمد سعد وجابه بالظبط، وزميله عمل الشخصية التانية، وقعدوا وقت كتير، فأنا صفقت، وقلت لهم إنهم لازم يمشوا، عشان كنت خايفة أتشاط من المخرج وإبراهيم نصر، وفضلت أساعدهم عشان كنا بالليل".

وواصلت: "كنا في مهرجان القاهرة السينمائي الدولي، تم عرض فيلم له مع سوسن بدر، وسلّم عليّ، وقالّي ازيك يا انتصار، فقالي إنتي مش فاكرة!؟ قالي أنا الولد الصغير اللي كان معاه صاحبه على مسرح البالون وفكّرني بالموقف".

كما كشفت عن سر تركها برنامج "نفسنة" الذي كانت تقدّمه مع الفنانتين هيدي كرم وشيماء سيف على قناة "القاهرة والناس"، قائلة: "الإدارة فهموا النفسنة غلط، كانوا عاوزين يخلّوا النفسنة بين الممثلين والإعلاميين بجد، لإننا كنا لُطاف وجمال مع بعض، وقالوا عاوزين نعمل تسجيل بين الحلقات ونعمل بجد نفسنة توصل للجمهور".

وأكدت أنها رفضت هذا الأمر، بالقول: "بدأوا يضغطوا على الكلام ده واختاروا أضعف عنصر، القناة كانت عاوزانا نظهر إن فيه نفسنة بينّا، لكن ماكنوش عارفين، لأني كنت طبيعية وجميلة ولطيفة ومحدّش عملي حاجة".

ونفت أن يكون إبعادها من برنامج "نفسنة" بسبب زلة لسان، وتحديداً قولها "أنا النجمة هنا"، مؤكدةً: "التعالي مش من صفاتي، أنا بقالي كتير بشتغل، أنا طيبة جداً". وأضافت: "ولما أقول أنا النجمة هنا ده حقي، أنا قلت أنا النجمة، الناس بتستغرب ليه لما أقول أصل أنا الجامدة أوي، أصل أنا الحلوة أوي وأهم كوميديانة في مصر، الناس مستكترة عليّ ليه اللي أنا فيه... هو أنا أفضل أشتغل 20 سنة ولما آجي أقول أنا مشهورة يتقال إني متعالية؟! أنا مشهورة، اللي مش عاجبه إني مشهورة يضرب راسه في الحيط".

واختتمت انتصار حديثها بالقول: "ممشتش من البرنامج بدليل إني كملت بعد كده، لكن أنا مشيت لأن عندي مسلسلات كتير وبما إني أنا النجمة فأنا أكتر واحدة بشتغل في السوق، مسلسلات وأفلام ومسرحيات، الضغط عالي جداً، ومفيش تعاون من القناة في تنظيم أيام التسجيل. بسجل 3 أيام كل 15 يوم، ولما يكون عندي مسرحية في إسكندرية ومسلسل، يبقى نتعاون مع بعض شوية، سجلوا مع حد غيري أنا قابلة تجيبوا حد تاني لحد ما أشوف شغلي في الإسكندرية، رفضوا كل حلولي، وشعرت بالتعنت، ومع شوية هيصة، وعند أول تلكيكة خلعت".