بالفيديو - على عكازين مريم الخشت تكشف إصابتها أثناء التصوير

نشرت الفنانة الشابة مريم الخشت على حسابها الخاص بـ"إنستغرام" مقطع فيديو ظهرت خلاله وهي تتكئ في مشيها على عكازين كاشفة إصابتها أثناء تصوير مسلسل "مجنونة بيك".

وعلقت مريم على الفيديو قائلة: "بداية السنة دي كانت مختلفة.. واختلافها في حاجات كنت متعودة عليها بقالي سنين وكلها اتغيرت.. يعني السنة دي هي أول سنة مكنش في الردايو اللي بقالي فيه سنين، ومكُنش في رمضان لاول مرة من 5 سنين، ولأول مرة رجلي تتكسر وتخليني أقعد في البيت أطول فترة في حياتي في وقت بكل المقاييس اللي في الدنيا ماينفعش يحصل فيه كدهّ بس فعلاً ربنا كبير أوي ومش بيعمل حاجة وحشة، وأنا فعلاً مؤمنة بده".

وتابعت: "مسلسل (مجنونة بيك) تجربة مختلفة أول مرة تحصل في الوطن العربي، أول مسلسل استعراضي غنائي.. كل الناس اللي بتشتغل فيه بتعمل أقصى وأكتر حاجة عندها عشان يطلع في أحسن شكل، عدد استعراضات كبير وأغاني بتتحفظ وبتتسجل قبلها بفترة، وتيجي يا مريم يوم 30 مارس بعد أول أسبوعين تصوير تٌقعي على رجلك بعد مشهد عادي جداً، بعد الوقعة رجعت كملت التصوير، وبين توقيف التصوير وإننا نكمل لوقوف تصويره شهر كامل! ، كل التفاصيل والحاجات اللي عيشتها كانت مخلياني مش فاهمة إزاي هرجع بعد شهر أقدم أكتر من 13 استعراض! اختفيت فترة طويلة، وبعدها رجعت أصور وصورت كل الاستعراضات وانا رجلي لسه فيها مشاكل بس حماسي لكل حاجة كان مخليني أحسن، متحمسة لكل حاجة حصلت في المسلسل اللي بتشرف إني اشتغلت فيه".

واختتمت قائلة: "شكراً لكل الناس من المنتجة الجميلة سالي والي وحبايبي علي فايز واحمد جمال.. والمخرج صديقي الجميل جو بوعيد، وحبيبي مدير التصوير احمد زيتون ومصمم الاستعراضات الهايل هادي عواضة، والكاتب الخطير وصديقي عمرو مدحت، المزيكا اللي قدمها ومن اكتر الناس اللي شجعتني مصطفى الحلواني، والميكب ارتست حببتي آيه عبد الحميد وزمايلي واصدقائي اللي وقفوا جنبي جدا أمير المصري وآدم الشرقاوي وانتصار وإنجي كيوان ومراد مكرم ، ولتـــيم الإخراج اللي حرفياً "شالني" المسلسل كله بعد الوقعة، ولكل الناس اللي اشتغلوا وطلع عنيهم عشان المسلسل يخرج بأحسن شكل، متحمسة جداً تشوفوا "راندا" ومتحمسة تقولولي رأيكم".