بالفيديو - ياسمين صبري تتحدث عن زواجها مجدداً والأمومة والحلم الذي تعمل لتحقيقه

القاهرة – "لها" 27 سبتمبر 2022

خلال لقائها في برنامج "صاحبة السعادة"، الذي تقدّمه الإعلامية والفنانة إسعاد يونس على قناة dmc، كشفت الفنانة ياسمين صبري عن كيفية تعاملها مع الشائعات التي تعرضت لها خلال الفترة الماضية، مشيرة إلى أنها لا تلتفت الى تلك الشائعات.

وقالت: "الشائعات متعودة عليها من بدري وتعاملي معاها إن مش بيكون فيه رد فعل عندي، وعمري ما دورت إزاي أكون شاغلة الناس عشان التريند، لأ دي بتبقى حاجة ربانية من عند ربنا اهتمام الناس بدون أي ذرة كره أو عنف وده اللي خلّى عمري أطول".

وتطرقت ياسمين للحديث عن أمنيتها في إنشاء "براند" للمكياج جديد يحمل اسمها، قائلةً: "نفسي أعمل براند ميكآب من زمان وأحط فيه كل مشاكلي، لأني حصلي مشاكل كتير بسبب الميكآب لإني بقف قدام الكاميرا دايماً".

وردّت على الانتقادات التي تتعرض لها بسبب طريقتها في تقديم الأعمال الفنية وأسلوبها في التمثيل، فقالت: "بتفرج على كل أعمالي وبكون عارفة إيه الغلط وإيه اللي اتكروت وإيه اللي اتعمل بشكل خطأ، وأنا صريحة مع نفسي ومش بنحاز لي".


وحددت ياسمين صبري مواصفات علاقة الحب السليمة، ودعت جمهورها إلى عدم التأثر بالحكايات التي يتم تداولها عن أمثلة سلبية للحب، قائلة: "السعادة حبيب وعيلة، والحب جميل لما يكون من الشخص الصح". وأضافت: "مش عايزة الناس تحس من الأمثلة اللي بيشوفوها إن الحب دمار وتقطيع شرايين".

وردًا على سؤال: ما أكثر شيء حمدت الله على البعد عنه؟ قالت: "الأصدقاء الوحشين، الواحد بيعدي على أصحاب وبعدين يلاقي معاملتهم مش أحسن حاجة، أو إنها كانت صداقة من طرف واحد، ومع ناس مش بتحكي وتتكلم معاكي". وتابعت: "أنا صداقاتي معظمها بنات، وفي صداقات بعدت عنها".

وردًا على سؤال: هل تعانين من الوحدة في حياتك؟ قالت: "أنا شخصية منغلقة، ومش بتكلم عن أموري الشخصية، لكن مش وحيدة".

وأكدت أنها تعرف بحكم دراستها لعلم النفس أهمية البيئة الهادئة المحيطة بالطفل، لأنه يتأثر بكل شيء بدءاً من سن خمس سنوات. وأضافت: "الأطفال جمال جداً، ولازم لما الإنسان يقرر يجيب أطفال يكون مهيأ نفسياً وبيته مهيأ نفسياً للطفل، من غير عصبية وصوت عالي ودراما".

وردت على سؤال "عايزة حد يقوللك يا ماما؟" بقولها: "خليها مفاجأة، دي حاجة مقدرش أتكلم فيها".


وكشفت ياسمين صبري، تفاصيل رحلتها الى نيبال وبالي، مشيرة إلى أنها مارست اليوغا وتعلمت العديد من الأشياء، إذ قالت: "كل سنة بسافر دولة مختلفة، ومارست اليوغا مع راهب بوذي في بالي ونيبال لأن روحانياتهم مختلفة، والراهب كان بيتكلم عن الزهد في الحياة وأكد لي إن مفيش شيء دايم".

وواصلت: "نفسي الناس تبطل تهتم بالتريندات ويعرفوا إن فيه حاجات وأماكن جميلة العالم، وبلاش نتعلق بأي شيء مادي لأن مفيش ولا جمال ولا سلطة ونفوذ دايمين".



وتابعت: "في مشاهد لما كنت بتفرج عليها كنت بقول فيها يا نهار أسود وأكلم نفسي... وعشان كده باطور من نفسي". وأضافت: "ودائماً بفتكر نصيحة أستاذ محمود عبد العزيز في مسلسل "جبل الحلال"، لما قالي إن الناس اللي حاوليا هما أكتر ناس هيوقعوني".

وأكدت أنها تعرضت للاكتئاب بعد سقوطها في مادة الرياضيات خلال الثانوية العامة، حيث قالت: "أصبت باكتئاب في الثانوية العامة بعد ما جبت ملحق في مادة الرياضيات، وزعلت جداً وكنت بصحى من النوم بقول أنا ليه صحيت على الواقع اللي أنا فيه ده برغم إني باردة في الطبيعي".

وأضافت: "حسيت إن كل الناس بتعيط علشان اللي جاب 92% وأنا جبت ملحق، وخبيت على أهلي وقولتلهم إني نجحت. كنت وقتها بلعب سباحة وكان بيجيلي فلوس منها، فروحت أخدت دروس وامتحنت لحد أما نجحت من غير أهلي ما يعرفوا".