حلت الفنانة الشابة إيمي طلعت زكريا، ضيفة على برنامج "عيش سعيد"، والذي يقدمه إيهاب صالح، زلينا صالح، وسهى رضا، على قناة Etc.

وكشفت إيمي خلال اللقاء عن علاقتها بالفنانة هنا الزاهد، وأخواتها، ومن تتمنى العمل معه، وعن أعمالها القادمة، قائلة: "أنا فعلًا بعتبر هنا، وأخواتها إخواتي لأن فعلًا بابا كان بيحبهم جدًا، وأنا أي حد بابا كان بيحبه أنا بحبه، لسه حتى الأسبوع اللي فات كنت عندهم أنا وعمر، كنا سهرانين عندهم لحد بعد الفجر، وكانت هنا موجودة، وكنا قاعدين وأحمد قاعد يكلمنا فيديو كول، إحنا عيلة بعيد عن أي كلام مفيش غِيرة، غيرة إيه، يعني أنا لاين وهنا لاين تاني خالص، ودايمًا أي حاجة بتعملها أنا ببارك لها، وهي أي حاجة أنا بعملها هي بتبارك لي، وعلى طول مع بعض، وبنقعد مع بعض نفتكر بابا، ولازم نقرأ له الفاتحة، وإحنا قاعدين مع بعض متجمعين".

وتابعت: "لا هو زمانه مبسوط دلوقتي، حتى علاقة مامت هنا بمامتي حلوة جدًا جدًا، أصل خلاص هو راح في أي حاجة لا خلاص إحنا مع بعض، وكويسين مع بعض، وأم هنا، كانت قاعدة جنب ماما، في العزا وبيخدوا العزا".

وأضافت: "رغم أنه كان انفصل عن أم هنا قبل الوفاة بسنة، بس علاقتنا كانت كويسة، أنا بحبهم بحسهم إن هما إخواتي، بينا حاجات كتير ومواقف كتير، فلا مفيش بينا حاجة تانية خالص".

وأضافت: "أنا كان نفسي أشتغل مع الزعيم عادل إمام لكن ده محصلش اشتغلت مع سمير غانم وحسن يوسف، طبعًا ووقفت قدامهم على خشبة المسرح ده بالنسبة لي أنا كدا اكتفيت".

وأكملت: "نفسي أشتغل من الجيل ده طبعًا من أذكى الفنانين اللي أنا بشوفها، وهو نجم في حتته وبرافو عليه جدًا ونفسي أشتغل معاه أحمد مكي".

وتابعت: "أحمد مكي ممثل ذكي، مبيتكلمش كتير على الفاضي، بيشتغل وبِينجح أي حد بيشتغل معاه، يعني بيومي فؤاد، محمد سلام، ناس كتير جدًا اشتغلوا معاه ونجحوا، ونفسي جدًا أشتغل معاه، ورحمة وكل الناس دي". وأضافت: "هو بيحب يساعد الممثل، مبيحبش يبخل على الممثل بأي حاجة فنفسي أشتغل مع أحمد مكي جدًا".

وتابعت: "هو لسه مفيش تحضير لحاجة في رمضان بس في مسرح، لأني بعشق المسرح جدًا، مع المنتج الكبير أحمد الإبياري، أنا مش عارفة هيقول إيه بعد التصريح ده ربنا يستر، حاجة برضو قريب إن شاء الله وهتبقى حاجة على مستوى كبير جدًا وحاجة فيها شغل كتير".