حلت الفنانة سحر رامي ضيف على برنامج "كل الناس" الذي تقدمه الإعلامية ياسمين عز على قناة mc مصر، حيث أعربت عن حزنها الشديد لوفاة زوجها الفنان الراحل حسين الإمام، كما كشفت عن اللحظات الأخيرة في حياته.

وتحدثت سحر رامي عن علاقة الحب الكبيرة التي تجمعها مع زوجها الفنان الراحل حسين الإمام، حيث قالت: "مش قادرة أقول إن حسين الإمام توفي وساعات بكلمه وأقوله سايبنا ليه؟ وإحساسي إنه مشي شوية وواثقة إننا هنتقابل وأنا لحد ما أموت هفضل حرم حسين الإمام ولا يمكن أتجوز تاني لأني مازلت متجوزة".

وتابعت حديثها عن اللحظات الأخيرة في حياة زوجها حسين الإمام، قائلة: "حسين الإمام مات في حضني ودا قدري وهو دخل الحمام واتأخر وقلقت عليه وقالي أنا تعبان وسندته كدا ولقيته دايخ ووقع وجه في دماغي إنه تعب من دخان الحمام وفي أقل من 5 دقايق لقيته راح مني، وكنت منهارة وبزعق وبصوت والتشخيص الدكتور قالي إنها جلطة مفاجئة، مش هتتلحق غير بـحقنة بتتاخد في القلب خلال 10 دقايق.

وأردفت: "أحنا كنا في الطريق الصحراوي وملحقناش، وكان لا يمكن تتلحق ولو اتلحقت كانت هتسيب أثر وكان هيبقى مشلول أو أعمى ودا أوحش من الفراق ودي أول مرة تحصله وعمره ما اشتكى من حاجة وكان شيء غير متوقع.

وتحدثت رامي عن شائعة ارتدائها الحجاب واعتزالها التمثيل، قائلة: "الجمهور مش بيبقى عارف إيه في المطبخ، إيه اللي جوه الموضوع يعني، وأصحابي وأهلي والجمهور في الشارع أما بيشوفوني بيقولوا إيه إنتي مش عايزة تشتغلي، كأن الواحد هو اللي بيشغل نفسه، أنا بعيدة خالص عن شائعة الحجاب، ودايمًا يربطوا بين الاعتزال والحجاب".

وتابعت: "أنا بعيدة خالص عن الموضوع ده، بعيدة عن إشاعة زي ديه، أنا مش متحفظة أنا طبيعية، ولو في أدوار مش بتناسبني مبعملهاش، ومش هحط فيها أسباب دينية أو أخلاقية، أنا معنديش مانع أي حد يعمل أي حاجة، مليش حكم في اختياره، ومعرفش طلعوا عليه الإشاعة ديه، ومش حاطة شروط للأدوار، والفن فن".

واختتمت سحر رامي حديثها عن طريقة اختيارها الأدوار وملابس الشخصيات، إذ قالت: "لازم ألبس اللي يناسبني، لو في دور طالعة راقصة هلبس لبسها، وكنت عامله دور راقصة قبل كده، متعرضش عليا دور فيه بوس في الأفلام، ومعرفش لو أتعرض هعمل إيه، ومتحطش في الموقف ده.