حلّت الفنانة دينا الشربينى ضيفةً على برنامج "سهرانين" الذي يقدّمه النجم والإعلامى أمير كرارة على قناة ONE، حيث تحدثت عن حبّها للتمثيل، قائلةً: "أنا بحب الأفلام الأبيض والأسود جداً وعندي مسرحيات كتير زمان بحبها وبتفرج على طول عليها، لأن أنا لما بعلق على حاجة عمري ما بزهق منها، وشادية بالنسبة ليا عشق كبير".

وعن طريقتها في إقناع أهلها بدخول عالم التمثيل، قالت دينا: "والدتي مكانتش موافقة خالص وأنا هاموت وأدخل أي حاجة خاصة بالتمثيل، فكنت بأدخل الحمّام وأقعد أمثل جوة خوف منها، وكنت أقعد كتير جداً، ووالدي مكانش بيعترض على أي حاجة عاوزاها بس هو كان نفسه أكون مذيعة، فقالي على فكرة نخلي والدتي توافق على التمثيل وهي إني أكون مذيعة في الأول وواحدة واحدة أدخل مجال التمثيل، وفعلا بدأت كمذيعة في برنامج "شبابيك" وبرنامج "عز الشباب"".

أما عن السهر فقالت دينا الشربيني: "أنا من الناس اللي بتنام بدري جداً، وألذ يوم بالنسبة ليا لما بنام الساعة 10 بليل، بس للأسف بنام كتير، يعني آخر مرة نمت يومين ونص، لكن في الأيام العادية ممكن أصحى بدري وبيكون حاجة من الاتنين يا ألعب رياضة وجيم يا إما آكل كتير". وتابعت: "أنا مبعرفش أكدب خالص ومجرد حد يسألني بقول على طول كل حاجة، لدرجة إن والدة واحدة صحبتي وإحنا صغيرين كانت لما تحب تعرف كل حاجة تندهلي وأقولها كل حاجة، فكانت بتناديني بعاطف السكري عشان كدة صحباتي كانوا بينادوني بعاطف وأنا صغيرة".