خلال حواره مع الإعلامية منى الشاذلي في برنامج "معكم منى الشاذلي" المذاع على قناة cbc، كشف الفنان محمد الشرنوبي تفاصيل دخوله عالم الفن، وتحديداً اختياره لمجال التمثيل قبل الغناء، حيث كان يرغب في الابتعاد عن فكرة الواسطة، وحتى لا يعتقد الجمهور أن والده الملحن فاروق الشرنوبي هو سبب دخوله المجال.

وأوضح الشرنوبي أنه رفض البدء بالغناء قبل التمثيل، لأنه كان يريد الابتعاد عن مجال عمل أبيه، قائلاً: "كان عندي قناعة إن لو غنيت الأول الناس هتقول إن أبويا اللي خلاّني أدخل الوسط، فكنت عاوز أمثل وتبقى حاجة بعيدة عن الحتة اللي أبويا بيعملها، عشان أبقى بنيت نفسي بنفسي... كنت أوفر أوي وعملت جوه نفسي صراع ملوش لازمة".

وتابع أنه بالفعل أجرى العديد من اختبارات الأداء في التمثيل، حتى تم اختياره في مسلسل "في إيد أمينة" مع الفنانة يسرا، مضيفاً: "روحت أودشنز كتير ولفيت لفة محترمة لحد ما اشتغلت مع الأستاذة يسرا، ومن بعدها تتابعت المشاركات".

وعن مشاركته في مسرحية "ياما في الجراب يا حاوي"، مع الفنان القدير يحيى الفخراني، أشار الشرنوبي إلى أنه وافق عليها بدون قراءة النص، قائلاً: "أول ما عرفت إن المسرحية للدكتور يحيى الفخراني وافقت بدون ما أقرأ النص، يكفي إني هقف جنبه".

وأكد الشرنوبي أنه شخص مسالم، ولا يدخل في مشاكل مع أحد، لكنه تعرّض للسرقة بالإكراه قبل سنوات، أدت لإصابته في ذراعه.

وأوضح أنه خلال فترة الثورة والفوضى التي حدثت بعدها، كان يمتلك جهاز "أيفون 5"، كان قد اشتراه من الخارج، قائلاً: "كان أيفون 5 لسه نازل وجبته من برا وفرحان بيه أوي، كنت ساكن في أكتوبر ونزلت اشتري حاجة لقيت توك توك معدّي جنبي وقفني بطريقة غريبة". وأضاف: "قالي بقولك ايه يا كابتن العدة اللي في إيدك دي أنت جايبها منين، قلت له جايبها من برا مصر، كنت بتكلم بجد، قالي لا أنت جايبها من السادس ولبّست صاحبة المحل 200 جنيه مزروة، فتعالى معانا نشوف الحوار ده... قلت له مش جاي، فطلع مطواة وضربني في كتفي لقيت دم نازل فقولت له قشطة أنا جاي معاك، وركبت معاهم التوك توك واحد على يميني وواحد على شمالي".

وقاطعته الشاذلي قائلةً: "أنت كده اتخطفت مش اتثبت يا محمد"، ليردّ عليها ضاحكاً: "مظبوط". ويضيف: "وصلت معاهم في مكان كده ونضفوني... اخدوا الموبايل والمحفظة... المحفظة كان فيها 40 جنيه".