خلال لقائها مع برنامج ABTalks، الذي يقدّمه الإعلامي أنس بوخش على قناته الخاصة في "يوتيوب"، كشفت الفنانة شيرين رضا العديد من أسرارها الشخصية والفنية ونصائح والدها الفنان محمود رضا لها، وأيضاً الدروس التي تعلّمتها في حياتها.

وقالت شيرين: "أنا بعتبر نفسي فتاة... مش ست كبيرة... وشايفة نفسي بنت عندها 28 سنة... ولما توصل 30 سنة بتكون بلغت... وأنا لسة مبلغتش... ومش بحاول أصغّر نفسي وأتصرف كطفلة... وأنا فتاة بحاول أكتشف تجارب كثيرة ولا زلت".

وأضافت: "والدي قاللي وأنا صغيرة إنتي حلوة أوي وده هيسبّب لك مشاكل كتيرة، قلت له إيه ده ليه... لكن اكتشفت إن لما بتكون صغير في السن مبتفتكرش في اللي هيحصل، ولما كبرت فهمت إن الجمال بيخلّي الستات هتغير والرجالة هتحاول تقرّب منك".

وأردفت بالقول: "للجمال ثمن لازم تدفعه فإما أن تعتمد على جمالك وتدفع ذلك الثمن أو تنساه، وأنا مخلّيش جمالي يعملّي مشاكل".

وعن رأيها في الصداقة بين الرجل والمرأة، أكدت شيرين رضا أن الصداقة أكثر قيمةً من الزواج، قائلةً: "أؤمن بالصداقة بين الجنسين وكنت محظوظة إني جرّبت دا وعندي صديق مقرّب مني وأنا 11 سنة وما زلنا أصحاب، وإحنا مشكلتنا إننا بنبص على الجنس مش إن الشخص سواء ذكر أو أنثى هو إنسان في النهاية، وصعب الناس الكبار في الوطن العربي يفهموا دا".

وأضافت: "أهلي كان عقلهم متفتح واتعلمت الكلام دا منهم، وأمي أجنبية ووالدي منفتح عقلياً جداً، واتعلمت إن الصداقة أقيم من أي علاقة حب؛ لأن العلاقات غالباً بتنتهي بالطلاق أو الانفصال، ولكن أنا غلطت لما اتجوزت وأنا صغيرة لأني كنت طفلة 21 سنة، ومكنش عندي خبرة أكون أمّ... عادي أكون مطلّقة مرتين مع إني حاولت أكون زوجة كويسة وربّيت بنتي وعمري ما زعّقت لها، ولكن كنت أتمنى أخلّف وأنا 31 سنة وعندي خبرة في الحياة".

كما تطرقت شيرين رضا للحديث عن رأيها في الزواج حالياً، قائلةً: "الجواز مزيف، لأن الزوج لازم يكون صديقك المقرّب وتشاركه كل شيء وتفكر معاه، ولكن الناس مش بتعمل كدا وبيكملوا في العلاقات دي من أجل الماديات ولا أنصح بالزواج دلوقتي، والجيل الجديد مش هيتجوز لأنهم شايفين اللي بيحصل، لازم الست أو الراجل يسألوا نفسهم إيه هدف العلاقة دي؟ والمفروض إنها تدوم ومعظم الناس بتتجوز عشان أشياء مادية".