كشفت الفنانة بشرى عن حزنها الشديد على الحال التي وصل إليها الفنانون وصنّاع السينما، وذلك تعليقاً على تصريحات الفنانة نبيلة عبيد، خلال ندوتها في "مهرجان أسوان السينمائي الدولي لأفلام المرأة"، في خصوص دور المنتجين في مشوارها الفني، حيث أكدت أن هناك منتجين آمنوا بموهبتها ودائماً كانوا يغامرون معها من أجل تقديم عمل مختلف يُبرز موهبتها، عكس ما يحدث اليوم.

وقالت بشرى خلال الندوة: "أنا دمعت من حزني على حالنا، شوفت جمال ورقي نبيلة عبيد وهي بتحكي عن جمال المشوار، وإن إزاي في ناس عندهم وعي ومثقفين، مش في ناس بيحاولوا يهدوا الفنان ويضربوه في ضهره زي ما بنشوف". وأضافت: "المنتج زمان كان إنتاجه من جيبه، دلوقتي إحنا عبيد للمنصات، هنخيط العمل ونظبطه على مقاس اللي هيشتريه، زمان نبيلة عبيد اتعاملت مع مخرج أو منتج عايز ينتج لنبيلة، دلوقتي بقى مولد وصاحبه غايب".

وكانت بشرى قد صرحت على هامش حضورها "مهرجان أسوان لأفلام المرأة" بأنها لا تحب المناصب، حيث قالت: "مش بحب المناصب لأنها بتقيد وبتخلي الإنسان إيده مغلولة ومش بيعرف يتصرف بحريته، بحس إني نقيبة بلا حقيبة ووزيرة وسفيرة بلا حقيبة، الفنان الواعي والمثقف والمدرك لدوره بيمثل بلده في كل حاجة وبيخدم بلده من غير مناصب وأنا بحب أكون هذا الشخص وبحب أدعم الشخص اللي في المنصب من غير أي حاجة ومن غير ما آخد لقب".

كما أكدت بشرى أنها تخاف من الحسد، قائلةً: "يا رب يبعد عني العين لأني بخاف من الحسد، وبعمل حساب الحسد دلوقتي أكتر من قبل كده لأننا بقينا على المشاع بسبب السوشيال ميديا والموضوع بقى صعب".