خرج مطرب المهرجانت حسن شاكوش على جمهوره في بث مباشر على صفحته الخاصة بـ"فيسبوك" في ظهوره الأول له بعد زواجه، وجه من خلاله الشكر للنجوم الذين حضروا حفل زفافه، موجهاً رسالة عتاب لمن امتنع عن حضور الحفل متوعداً إياهم بوضعهم في القائمة السوداء.

ووجه شاكوش الشكر إلى النجوم الذين حضروا حفل زفافه، ومنهم تامر حسني ورامي صبري وماجد المصري وإيهاب توفيق ومصطفى قمر وحمو بيكا وعمر كمال وغيرهم، إذ قال: حابب أشكر كل النجوم اللي جت لي الفرح وبشكر كل نجم شرفني في فرحي، وتامر حسني وجوده كبير وشرف ليا وعلى المستوى الشخصي إحنا اخوات وأنا من معجبيه ومن جمهوره وده ما يقللش مني".

وأضاف: "بشكر حمو بيكا وعمر كمال وبشكر أحمد بتشان وأحمد شيبة والمدرسة محمود الليثي ويارا محمد وحمادة مجدي وشريف المصري، ورامي صبري وجوده شرف ليا لأنه حد كبير وبعشقه ورضا البحراوي ده العشق، والنجم الكبير اللي اتربينا على أغانيه مصطفى قمر ومحمد نور والنجمة وفاء عامر وماجد المصري وعصام صاصا ورندا البحيري والنجم الكبير إيهاب توفيق اللي اتربينا على أغانيه، وحمو بيكا مش أخويا ده قلبي، ومحمد شاهين وحودة بندق ورنا رئيس النجمة الكبيرة".

ووجه شاكوش رسالة إلى هنادي مهنا قائلًا: "هنادي مهنا قمر السينما اللي جاية وبجد حتة قمر ما شاء الله ربنا يحميها ويخليها لجوزها وأهلها، كما وجه رسالة إلى الفنان أحمد عصام قائلًا: "أجمد فاير شو على مستوى الوطن عربي واسمه أكبر من النار على العلم".

كما أكد حسن شاكوش عذره لبعض الفنانين الذين لم يحضروا لمرورهم بظروف خاصة، ومنهم الفنان مصطفى كامل نقيب المهن الموسيقية قائلًا: "ماجاش علشان دراعه مكسور وبقول له ألف سلامة عليك يا حبيبي".

وعذر حسن شاكوش المطرب بهاء سلطان لعدم حضوره حفل زفافه، مشيرًا إلى أنه كان في الكويت قائلًا: "الراجل ليه عذره ونفسي كان يكون موجود بحبه جدا وطبعاً".

واستكمل موجهًا رسالة لمن امتنع عن حضور حفل زفافه: "أي حد مجاش له عذره طالما عندك شغل مش هعلق ليك حبل المشنقة إلا بقى لو حد فاضي ومجاش ده موضوع تاني".

وأضاف: إحنا في مركب واحدة واللي ما تحتاجش قفاه دلوقتي هتحتاج وشه بعدين، واللي مجاش حطيته في القايمة السودة، وأنا ماكنش ناقص لي حد وكفاية أن ماجد المصري ييجي ويقف على المسرح ومصر كلها تشوفه وهو من أنضف الشخصيات اللي عرفتها في حياتي".

واستنكر شاكوش عدم حضور بعض المذيعين ممن دعاهم لزفافه وبعد انتهاء الحفل وتصدره التريند حاولوا الاتصال بإدارة أعماله حتى يظهر معهم في حلقة، قائلًا: "الغريب أن في مذيعين عزمتهم على الفرح ومجوش ولما الفرح عمل تريند عاوزني أطلع حلقة، أنت عبيط ولا إيه مش فاهم! عزمته ومجاش ولما الفرح عمل تريند عاوزني أطلع معاه حلقة هو يا عبيط يا أهبل".