حل الكاتب والشاعر أيمن بهجت قمر، ضيفاً على برنامج "أنا والقناع" الذي تقدمه الإعلامية منى عبد الوهاب على قناة الحياة، حيث كشف كيف وقفت الفنانة الكبيرة شريهان بجانبه في بداية حياته، وسرد مواقفها معه.

وقال قمر: "شريهان كانت بتاخدني أنزل أجيب لبس وتبعتلي ناس يبيضولي الشقة، وحاجات رفاهيات غير الفلوس اللي كانت بتديهالي، ومرة اتخانقت مع مرات خالي، وبيِّت في قسم الدقي، ولما كلمت صاحبي من الشباك قلت له كلم شريهان، كانت السند وهي من أجدع وأوفى الناس، بسميها شريهان جداً".

وأوضح قمر: "بعض أقاربي لم يكونوا يتصلون بي، ولو والدي كان عايش كان هيرد أمي تاني، بعد طلاق 13 سنة، وأنا كابن كان نفسي دا يحصل، عمري ما شوفت أبويا وأمي في كادر واحد، هي كانت متزوجة من المخرج المرحوم عادل صادق وأبويا وأمي مكانوش بيتقابلوا، وأبويا كان بيشتغل مع جوز أمي".

وتابع: "بعد ما والدي توفى في 3 يناير 1989، أمي اتطلقت من أبو أخواتي في شهر مايو، المرحوم عادل صادق، وأبويا لو موجود في السنة دي كان هيرد أمي".

وأضاف أنه أسقط قناع العشم ولا يستخدمه بعد الآن، مؤكداً أنه لا يعشم في أحد أيا كان، وأنه يفترض سوء النية في العمل: "حتى لو حد حبيبي بتيجي فترة يحصل أزمة بينا، والحمد لله محدش بيغدر بيا".

وتابع: "مفيش عزيز عندي، وكنت خائف من فشل مسرحية سيدتي الجميلة، وسأختار قناع أبويا علشان أحققله اللي محققوش، وأنا بنتج لأبويا ودي حاجة تسعدني إني ألاقي اسمه موجود في الشوارع".